«Úkimet úshin ándetip júrgem joq»: Aqbota Kerimbekova ataq alǵan ánshilerge shúılikti

Foto: ashyq derekkóz

Qazaqstandyq tanymal ánshi Aqbota Kerimbekova marapattalyp jatqan áriptesterine qatysty pikir bildirdi. О́ner ıesi osyǵan deıin memlkettik ataq almaǵanyn aıtty, dep jazady qandastar.kz KAZ.NUR.KZ-ke silteme jasap.

Kerimbekova Instagram-daǵy paraqshasynda azýly jazba jarııalap, ataq alǵan óner ıelerine shúılikti. «Jer-jerde shúlen taratý bastaldy. Qudaı-aý, ne degen ataqtar anaý?! «Eren eńbegi úshin», «Qurmet», «Parasat», «Dańq». Qazaqta sólkebaıǵa telinbegen sumdyq sózder qaldy ma eken, ózi?! Jylyna osy ataqtardy bálen júz adam alady eken. Ala bersin. Biraq memleket jaǵdaıy sonsha eren eńbek jasalynǵanǵa uqsaı ma?!  Úıdegiler keıde surap qalady «Ándetip júrgenińizge 30 jyl, mynadaı myńǵyrǵan ataqtyń bireýi sizge berilmeı me?» deıdi. «Aı, aınalaıyndar-aı, úkimet úshin ándetip júrgenim joq. Úkimet te ózi úshin án salmaıtyndarǵa bermeıtin shyǵar?! Odan keıin ataqtardy túgel alyp shyqqan keıbir adamdarmen meni qatar qoıyp, halyqtyń aldyna shyǵarsa, halyq bir de bir memlekettik ataǵy joq meni tanyp, qurmettep ketýi múmkin. Naǵyz baqyt – sol» dep qutylamyn. Oıym durys shyǵar dep oılaımyn. Taǵy shyndyǵym úshin «kóre almaı otyr» demese eken. Aıtpaqshy, qazaq tarıhynan da mańyzdy bop turǵan qazaq Tik-Tok-daǵy legendalary nege almaǵan? Nege bermeısińder?! Kóre almaı júrsińder me», – dep jazdy ánshi.