ۇكىمەتتە اۋىل شارۋاشىلىعىن دامىتۋ ماسەلەسى قارالدى

فوتو: ۇكىمەت

پرەمەر-مينيستر ولجاس بەكتەنوۆ وتاندىق اۋىل شارۋاشىلىعى تاۋارىن وندىرۋشىلەرمەن كەزدەسۋ وتكىزدى. وندا اگروونەركاسىپ كەشەنىن دامىتۋدىڭ وزەكتى ماسەلەلەرى, كوكتەمگى دالا جۇمىستارىنىڭ بارىسى, شارۋالاردى قولداۋ شارالارى, سونداي-اق قوسىمشا پىسىقتاۋدى قاجەت ەتەتىن ءوزارا ءىس-قيمىل باعىتتارى تالقىلاندى, دەپ جازدى qandastar.kz

مەملەكەت باسشىسىنىڭ ۇلتتىق قۇرىلتاي وتىرىسىندا العا قويعان مىندەتىنە سايكەس, الداعى بەس جىلدا اۋىل شارۋاشىلىعى ءونىمىنىڭ جالپى ءوندىرىسىن ەكى ەسە ارتتىرۋدىڭ كەلەشەگى قارالدى.

كەزدەسۋ باسىندا ءسوز العان ولجاس بەكتەنوۆ ۇكىمەت اگرارلىق سەكتورعا بەلسەندى تۇردە قولداۋ كورسەتىپ وتىرعانىن اتاپ ءوتتى.

«پرەزيدەنت قولداۋىنىڭ ارقاسىندا اۋىل شارۋاشىلىعىنا ەرەكشە كوڭىل بولىنۋدە. مەملەكەت باسشىسى اتاپ وتكەندەي, ەلىمىزدىڭ ازىق-ت ۇلىك قاۋىپسىزدىگى ءوزىنىڭ قۇندىلىعىن ەشقاشان جويمايدى.

ءبىزدىڭ جاعدايىمىزدا جەڭىلدەتىلگەن قارجىلاندىرۋ ءۇشىن 700 ملرد تەڭگە تابۋ وڭاي ەمەس, الايدا, ءبىز مۇنى ىسكە اسىرىپ جاتىرمىز جانە قولداۋدىڭ بۇل ءتۇرىن ودان ءارى ارتتىرا بەرەمىز. قازىرگى قولدانىستاعى تەتىكتەردىڭ بارلىعى جالعاسىن تابادى. ناتيجەسى دە جوعارى بولىپ, ءبىز باسەكەگە قابىلەتتى اۋىل شارۋاشىلىعىن قۇرا الامىز دەگەن سەنىم بار»,— دەپ اتاپ ءوتتى پرەمەر-مينيستر.

اۋىل شارۋاشىلىعى ءمينيسترى ايداربەك ساپاروۆ شارۋالاردى قولداۋ شارالارىن كەڭەيتۋ بويىنشا جۇرگىزىلىپ جاتقان جۇمىستار تۋرالى باياندادى:

• ەگىس ناۋقانىن جەڭىلدىكپەن قارجىلاندىرۋ كولەمى وتكەن جىلى 580 ملرد تەڭگەگە دەيىن جانە نەسيەلەۋدى مەرزىمىنەن بۇرىن ىسكە قوسۋ ارقىلى بيىل رەكوردتىق 700 ملرد تەڭگەگە دەيىن ارتتى (بۇرىن قارجىلاندىرۋ 140 ملرد تەڭگەدەن اسپاعان). العاش رەت كوكتەمگى دالا جۇمىستارىندا قارىز سوماسىنىڭ 85%-نا دەيىن كەپىلدەندىرۋدىڭ ارنايى باعدارلاماسى ەنگىزىلدى;
• ءبىر جىل ىشىندە قارجىلاندىرۋ كولەمىن 80 ملرد تەڭگەگە ۇلعايتۋ ارقىلى 5%-بەن 200 ملرد تەڭگەگە دەيىن جەتكىزۋ اۋىل شارۋاشىلىعى تەحنيكاسى ليزينگىنىڭ قولجەتىمدىلىگى ارتتى, بۇل رەتتە تەحنيكانىڭ ءوزى – كەپىل, ال جارنا ينۆەستيتسيالىق سۋبسيديا بولا الادى;
• ازىق-ت ۇلىك كورپوراتسياسىنا فورۆاردتىق ساتىپ الۋلارعا 30 ملرد تەڭگە, گەوگرافيانى كەڭەيتۋ ءۇشىن ەكسپورتتىق شىعىستاردى سۋبسيديالاۋعا 40 ملرد تەڭگە ءبولىندى;
• قايتا وڭدەۋ كاسىپورىندارىنا اينالىم قاراجاتىن تولىقتىرۋ ءۇشىن نەسيە بەرۋ وتكەن جىلدان باستالدى. نەسيەلەۋ كولەمى 35 ملرد تەڭگەنى قۇرايدى. بيىل بۇل ماقساتتارعا 48 ملرد تەڭگە ءبولۋ مىندەتى تۇر. اينالىم ماقساتتارى ءۇشىن جەڭىلدىكتى نەسيەلەر قايتا وڭدەۋدى جۇكتەۋگە مۇمكىندىك بەرەدى.

سونىمەن قاتار ۇكىمەت اۋىل تۇرعىندارىن جىل بويى جۇمىسپەن قامتاماسىز ەتەتىن سالا رەتىندە مال شارۋاشىلىعىن دامىتۋعا ەرەكشە كوڭىل ءبولىپ وتىر. وسىلايشا, مال بورداقىلاۋ الاڭدارى ءۇشىن قولداۋ قۇرالدارى ازىرلەنۋدە, جەڭىلدىكپەن نەسيە بەرۋ جانە سۋبسيديالاردىڭ جەڭىل اكىمشىلەندىرىلەتىن تۇرلەرىنىڭ پايداسىنا سەلەكتسيالىق-اسىل تۇقىمدىق جۇمىستى سۋبسيديالاۋ قايتا قارالادى.