«ۇكىمەتتەن جاقسى جاڭالىق كەلىپ جەتتى»: دەپۋتات ارالباي ۇلى حالىقتان ءسۇيىنشى سۇرادى

فوتو: parlam.kz

ءماجىلىس دەپۋتاتى نارتاي ارالباي ۇلىنىڭ ايتۋىنشا, ەندى قازاقستان بيلىگى سپورت لەگيونەرلەرىنە قاراجات بولمەيدى, دەپ حابارلايدى Qaz365.kz.

«بىزگە جاقسى جاڭالىق كەلىپ جەتتى. لەگيونەرلەرگە, قازاقستاندا جۇرگەن شەتەلدىك سپورتشىلارعا بيۋدجەت قاراجاتىنان ءبىر تيىن بەرىلمەۋى كەرەك جانە كۆازيمەملەكەتتىك سەكتوردان, «سامۇرىق-قازىنا» سەكىلدى قوردىڭ اقشاسى دا بەرىلمەۋى ءتيىس دەگەن نورمانى زاڭعا ەنگىزدىم. ارىپتەس دەپۋتاتتار قولدادى», – دەيدى نارتاي ارالباي.

ونىڭ ايتۋىنشا, تاياۋدا ۇكىمەتتەن ءتيىستى قورىتىندى كەلگەن. دەپۋتاتتىڭ ايتۋىنشا, ەندى لەگيونەرلەرگە كۆازيمەملەكەتتىك سەكتوردان دا, بيۋدجەتتەن دە قاراجات بەرىلمەيدى.

«حالىقتىڭ اقشاسى تەك حالىقتىڭ يگىلىگىنە جۇمسالۋى كەرەك. سپورتتاعى قاراجات سونىمەن قاتار ناتيجەسى جوعارى سپورتشىلارعا بەرىلەدى. ونىڭ ىشىندە باسىم سپورت تۇرلەرىنە. 180 سپورت تۇرىنە مەملەكەت بيۋدجەتىنىڭ اقشاسى بەرىلمەيدى. ونىڭ ىشىندە سپورت تۇرلەرى – وليمپيادالىق, ازيادا ويىندارى, سۋردوليمپيادا, پاراليمپيادا ويىندارى تىزىمىنە ەنگەن سپورت تۇرلەرىنە عانا قاراجات بولىنەدى. ودان بولەك مەملەكەتتىك سپورتتىق ۇيىمدارداعى بالالارعا, بۇقارالىق سپورتقا بەرىلەدى. مەملەكەتتىڭ قاراجاتى بۇرىنعىداي وڭدى-سولدى شاشىلمايدى», – دەيدى ول.

ەسكە سالا كەتەيىك, پرەزيدەنت قاسىم-جومارت توقاەۆ ءحححىىى جازعى وليمپيادا ويىندارىنىڭ جۇلدەگەرلەرىمەن كەزدەسكەندە لەگيونەرلەر ماسەلەسىن دە قوزعاعان ەدى. «سىرتتان كەلەتىن لەگيونەرلەرگە توقتاۋ سالىنۋى ءتيىس» دەيدى مەملەكەت باسشىسى. قاسىم-جومارت توقاەۆ شەتەلدىك سپورتشىلارعا ازاماتتىق بەرىپ, ەل اتىنان دوداعا قوسۋ تاجىريبەسىن دوعارۋ كەرەك ەكەنىن ايتقان بولاتىن.