«Úkimetten jaqsy jańalyq kelip jetti»: depýtat Aralbaıuly halyqtan súıinshi surady

Foto: parlam.kz

Májilis depýtaty Nartaı Aralbaıulynyń aıtýynsha, endi Qazaqstan bıligi sport legıonerlerine qarajat bólmeıdi, dep habarlaıdy Qaz365.kz.

«Bizge jaqsy jańalyq kelip jetti. Legıonerlerge, Qazaqstanda júrgen sheteldik sportshylarǵa bıýdjet qarajatynan bir tıyn berilmeýi kerek jáne kvazımemlekettik sektordan, «Samuryq-Qazyna» sekildi qordyń aqshasy da berilmeýi tıis degen normany zańǵa engizdim. Áriptes depýtattar qoldady», – deıdi Nartaı Aralbaı.

Onyń aıtýynsha, taıaýda Úkimetten tıisti qorytyndy kelgen. Depýtattyń aıtýynsha, endi legıonerlerge kvazımemlekettik sektordan da, bıýdjetten de qarajat berilmeıdi.

«Halyqtyń aqshasy tek halyqtyń ıgiligine jumsalýy kerek. Sporttaǵy qarajat sonymen qatar nátıjesi joǵary sportshylarǵa beriledi. Onyń ishinde basym sport túrlerine. 180 sport túrine memleket bıýdjetiniń aqshasy berilmeıdi. Onyń ishinde sport túrleri – Olımpıadalyq, Azıada oıyndary, Sýrdolımpıada, Paralımpıada oıyndary tizimine engen sport túrlerine ǵana qarajat bólinedi. Odan bólek memlekettik sporttyq uıymdardaǵy balalarǵa, buqaralyq sportqa beriledi. Memlekettiń qarajaty burynǵydaı ońdy-soldy shashylmaıdy», – deıdi ol.

Eske sala keteıik, Prezıdent Qasym-Jomart Toqaev HHHIII jazǵy Olımpıada oıyndarynyń júldegerlerimen kezdeskende legıonerler máselesin de qozǵaǵan edi. «Syrttan keletin legıonerlerge toqtaý salynýy tıis» deıdi Memleket basshysy. Qasym-Jomart Toqaev sheteldik sportshylarǵa azamattyq berip, el atynan dodaǵa qosý tájirıbesin doǵarý kerek ekenin aıtqan bolatyn.