ۇكىمەتتىڭ كەڭەيتىلگەن وتىرىسىندا قانداي ماسەلەلەر كوتەرىلەدى? – بەلگىلى ساياساتتانۋشى پىكىر ءبىلدىردى

مەملەكەت باسشىسى قاسىم-جومارت توقاەۆتىڭ توراعالىعىمەن 2025 جىلعى 28 قاڭتاردا ۇكىمەتتىڭ كەڭەيتىلگەن وتىرىسى وتەدى. وسى ورايدا, كەڭەيتىلگەن وتىرىستا قانداي ماسەلەلەر كوتەرىلۋى مۇمكىن دەگەن سۇراقپەن Skifnews.kz اقپارات پورتالى بىلگىلى ساياساتتانۋشى, قازبەك مايگەلدينوۆتىڭ پىكىرىن ءبىلدى, دەپ جازدى qandastar.kz

اقوردانىڭ حابارلاۋىنشا, وتىرىس بارىسىندا ەلىمىزدىڭ بىلتىرعى الەۋمەتتىك-ەكونوميكالىق دامۋىنىڭ قورىتىندىلارى شىعارىلىپ, ۇكىمەتتىڭ الداعى كەزەڭگە ارنالعان نەگىزگى مىندەتتەرى ايقىندالادى.

سونىمەن قاتار پرەمەر-مينيستر ولجاس بەكتەنوۆ, ۇلتتىق بانك توراعاسى تيمۋر سۇلەيمەنوۆ جانە بىرقاتار ءوڭىردىڭ اكىمدەرى بايانداما جاسايدى.

ساياساتتانۋشى قازبەك مايگەلدينوۆتىڭ ايتۋىنشا, سەيسەنبى كۇنى وتەتىن ۇكىمەتتىڭ كەڭەيتىلگەن وتىرىسى بىرىنشىدەن 2024 جىلدىڭ قورىتىندىلارىن انىقتايتىن بولادى.

«كوتەرىلەتىن تاقىرىپتارعا كەلەتىن بولساق, ءبىرىنشىسى قازاقستاننىڭ ەكونوميكاسىندا مۇناي تاۋەلدىلىگىنىڭ زارداپتارىنا ءتۇسىپ قالماۋ. كەشە ترامپتىڭ وپەك ەلدەرىمەن كەزدەسۋىندە, داۆوستا بولعان مالىمدەمەسىندە مۇناي باعاسىن 45 دوللارعا دەيىن ءتۇسىرۋ مۇمكىندىگىن ايتىپ وتىر. ءبىزدىڭ بيۋدجەت الداعى 3 جىلدا 75 دوللار مولشەرىندە سالىنعان. ياعني, ءوندىرىس ورىندارىن اشۋ سياقتى ەكونوميكالىق ءارتاراپتاندىرۋ ماسەلەسىن قاراستىرا كەرەك.

ەكىنشى ماسەلە, قازىرگى تاڭدا ەكونوميكادا شاعىن جانە ورتا بيزنەس ماسەلەسىن كوتەرىپ, ۇلەسىن ارتتىرۋ كەرەك. ويتكەنى بۇل ەكونوميكانىڭ باستى  قوزعالتقىش كۇشى دەپ ايتۋعا بولادى. دەسەك تە, الەۋمەتتىك جەلىدە قوسىمشا قۇن سالىعىن 20 پايىزعا دەيىن كوتەرۋ ماسەلەسى قاتتى تالقىلانىپ جاتىر. بۇل شاعىن جانە ورتا بيزنەسكە زارداپ كەلتىرەتىن نارسە. سوندىقتان وسى ماسەلەنى دە قاراستىرۋ كەرەك.

ءۇشىنشى ءبىر ماسەلە, ول – ايماقتار ماسەلەسى. ايماقتارداعى ينفراقۇرىلىمدىق دامۋىنا ينۆەستيتسيا تارتۋ. وبلىس اكىمدەرى ءوز ەسەپتەرىندە ايتا جاتار, بىراق الداعى ۋاقىتتا ايماقتار اراسىنداعى تەڭسىزدىك ماسەلەسىن شەشۋ كەرەك. ويتكەنى, ءبىزدىڭ ەلدە ءبىر ايماقتاردىڭ دامۋى جوعارى دەڭگەيدە, ەكىنشى ايماق دونور بولىپ وتىر وعان, ءۇشىنشى ايماق ارتتا قالىپ وتىر دەگەن سياقتى. بۇل ماسەلەنى جالپى ورتاق ءبىر جوسپار قۇرۋمەن عانا شەشۋگە بولادى.

سوڭعى ءبىر ماڭىزدى ماسەلە بار, ول – ينفلياتسيا ماسەلەسى. 2024 جىلى ينفلياتسيا وتە جوعارى بولدى. قازىر اقش ارەكەتتەرىنە وراي, الداعى ۋاقىتتا تىپتەن قۇلدىراۋى مۇمكىن. رەسەي ءرۋبلى قۇلدىراسا, تەڭگەمىزدى ۇستاپ تۇرۋ دا قيىن بولادى. ناتيجەسىندە, بىزدە اقشا-نەسيە ساياساتىن قايتا قاراۋ ماسەلەسى قاراستىرىلۋ كەرەك. ويتكەنى, بۇل حالىقتىڭ ءال-اۋقاتى, ساتىپ الۋ مۇمكىندىگى سوعان تىكەلەي اسەر ەتەدى», – دەپ پىكىر ءبىلدىردى ول.