ۋكراينا مەن رەسەي قاشان كەلىسسوز جۇرگىزەدى?

ۋكراينا پرەزيدەنتى ۆلاديمير زەلەنسكي كيەۆ پەن ۆاشينگتوننىڭ رەسەيمەن ءىشىنارا اتىستى توقتاتۋ تۋرالى كەلىسسوزدەر وتكىزەتىنىن راستادى. ونىڭ ايتۋىنشا, كەزدەسۋ 24 ناۋرىزدا ساۋد ارابياسىندا وتەدى. بۇل تۋرالى ول وسلودا نورۆەگيا پرەمەر-ءمينيسترى يوناس گار ستيورەمەن بىرلەسكەن ءباسپاسوز ءماسليحاتىندا مالىمدەدى, دەپ حابارلايدى qandastar.kz اقپارات پورتالى DW اگەنتتىگىنە سىلتەمە جاساپ.

اقش پرەزيدەنتىنىڭ ارنايى وكىلى كيت كەللوگتىڭ ايتۋىنشا, كەلىسسوزدەر “جاقىندىق قاعيداتى” بويىنشا وتەدى. ياعني, ۋكراينا مەن رەسەي وكىلدەرى ەكى بولەك بولمەدە وتىرادى, ال امەريكالىق دەلەگاتسيا ولاردىڭ اراسىندا ءجۇرىپ, ءار تاراپپەن جەكە سويلەسەدى.

ABC News-كە بەرگەن سۇحباتىندا كەللوگ اقش دەلەگاتسياسىنىڭ قۇرامىندا مەملەكەتتىك حاتشى رۋبيو مەن ساياساتتى جوسپارلاۋ جونىندەگى ديرەكتور مايكل انتون بولاتىنىن ايتتى.

كەلىسسوزدەر قوناقۇيدە وتەدى. ءبىر توپ ءبىر بولمەدە, ەكىنشىسى باسقا بولمەدە وتىرادى. ولار سويلەسىپ, ءوز ويلارىن ايتادى, ال امەريكالىق دەلەگاتسيا ولاردىڭ اراسىندا ءجۇرىپ, اقپارات الماستىرادى. وسىلايشا, ءبىز ەكى تاراپتىڭ ناقتى ۇستانىمىن انىقتايمىز, – دەدى كەللوگ.

ونىڭ ايتۋىنشا, الدىمەن اقش وكىلدەرى ۋكراينا دەلەگاتسياسىمەن كەزدەسەدى, سودان كەيىن رەسەي جاعىنىڭ پىكىرىن تىڭدايدى. زەلەنسكي بۇل كەزدەسۋدە ەڭ الدىمەن ەنەرگەتيكالىق نىساندارعا شابۋىل جاساماۋ جونىندەگى اتىستى توقتاتۋ ماسەلەسى تالقىلاناتىنىن اتاپ ءوتتى.

ال رەسەي تاراپى قارا تەڭىزدەگى كەمە قاتىناسىنىڭ قاۋىپسىزدىگىن قايتا قالپىنا كەلتىرۋدى تالقىلاماق. بۇل تۋرالى رەسەي پرەزيدەنتىنىڭ كومەكشىسى يۋري ۋشاكوۆ مالىمدەدى.

ول سونداي-اق 24 ناۋرىزدا ەر-ريادتا رەسەي مەن اقش وكىلدەرىنىڭ كەزدەسەتىنى راستالعانىن ايتتى. رەسەي دەلەگاتسياسىن فەدەراتسيا كەڭەسىنىڭ حالىقارالىق ىستەر جونىندەگى كوميتەتىنىڭ توراعاسى گريگوري كاراسين مەن فسب ديرەكتورىنىڭ كەڭەسشىسى سەرگەي بەسەدا باسقارادى.