جاڭالىقتار
ۋكراينا ترامپتىڭ تالابىنا اقىرى كەلىستى: 30 كۇن ىشىندە اتىستى توقتاتۋ كەرەك
فوتو: اشىق دەرەككوز
ۋكراينا مەن اقش دەلەگاتسيالارىنىڭ جيدداداعى كەزدەسۋى قورىتىندىسى بويىنشا بىرلەسكەن مالىمدەمە ۋكراينا پرەزيدەنتىنىڭ سايتىندا جاريالاندى, دەپ حابارلايدى qandastar.kz
“ۋكراينا اقش-تىڭ ۋاقىتشا 30 كۇندىك اتىستى توقتاتۋ رەجيمىن دەرەۋ ەنگىزۋ تۋرالى ۇسىنىسىن قابىلداۋعا دايىن ەكەنىن ءبىلدىردى. بۇل رەجيم ەكى تاراپتىڭ ءوزارا كەلىسىمى نەگىزىندە ۇزارتىلۋى مۇمكىن. الايدا بۇل شەشىم رەسەي فەدەراتسياسىنىڭ قابىلداۋى مەن ءبىر ۋاقىتتا ورىنداۋىنا بايلانىستى. اقش رەسەيگە, ءوزارا جاۋاپكەرشىلىك بەيبىتشىلىككە جەتۋدىڭ باستى شارتى ەكەنىن حابارلايدى”, – دەلىنگەن مالىمدەمەدە.
سونىمەن قاتار, اقش ۋكرايناعا بارلاۋ مالىمەتتەرىن بەرۋ بويىنشا ەنگىزىلگەن كىدىرىستى دەرەۋ جويىپ, قاۋىپسىزدىك كومەگىن قالپىنا كەلتىرەدى.
دەلەگاتسيالار سونداي-اق بەيبىتشىلىك ۇدەرىسىنىڭ ماڭىزدى بولىگى رەتىندە گۋمانيتارلىق ماسەلەلەردى تالقىلادى. اتاپ ايتقاندا, اتىستى توقتاتۋ كەزەڭىندە اسكەري تۇتقىندارمەن الماسۋ, ازاماتتىق تۇلعالاردى بوساتۋ جانە كۇشتەپ كوشىرىلگەن ۋكراينالىق بالالاردى قايتارۋ ماسەلەلەرى قوزعالدى.
Alash.kz جازعانداي, اقش بۇل ۇسىنىستاردى رەسەي وكىلدەرىمەن تالقىلاۋعا مىندەتتەمە الدى. ۋكراينا دەلەگاتسياسى ەۋروپالىق سەرىكتەستەر بەيبىتشىلىك ۇدەرىسىنە قاتىسۋى ءتيىس ەكەنىن تاعى دا اتاپ ءوتتى.
