ۋكرايناداعى سوعىس باستالعاننان كەيىن قازاقستانعا كەلگەن 80 مىڭ رەسەيلىك ەلىنە قايتا ورالماعان

فوتو: gazeta.ru

رەسەي مەن ۋكراينا اراسىنداعى سوعىس باستالعالى بەرى 80 مىڭ رەسەيلىك قازاقستانعا كەتىپ, قايتا ورالماعان. بۇل تۋرالى Stan.kz اقپارات اگەنتتىگى حابارلايدى.

The Bell پورتالىنىڭ مالىمەتىنشە, ۋكرايناداعى سوعىس باستالعاننان كەيىن رەسەيدەن شامامەن 666 مىڭ ادام كەتىپ, ءالى ەلىنە ورالماعان.

زەرتتەۋگە سايكەس, 2022 جىلى رەسەيلىكتەر قونىس اۋدارعان جەتەكشى ەلدەر قاتارىندا ارمەنيا (110 مىڭ ادام), قازاقستان (80 مىڭ), گرۋزيا (74 مىڭ) سياقتى ۆيزاسىز باعىتتار بار. ال يزرايلگە 80 مىڭ, اقش-قا 48 مىڭعا جۋىق رەسەيلىك قونىس اۋدارعانى حابارلاندى.

ەۋروپا ەلدەرىنەن رەسەيلىكتەر كوبىنە گەرمانياعا (36 مىڭ ادام), لاتۆياعا (18 مىڭ), يسپانياعا (16 مىڭ) جانە نيدەرلاندىعا (12 مىڭ) كەتكەن. ەۋروپالىق وداقتان تىس سەربياعا 30 مىڭعا جۋىق رەسەيلىك قونىس اۋدارعان.

The Bell حابارلاۋىنشا, ۋكرايناداعى سوعىس باستالعاننان كەيىن رەسەيلىكتەردىڭ ەميگراتسياسى كەيىنگى 20 جىلداعى ەڭ ۇلكەن كورسەتكىشكە جەتكەن. بۇعان دەيىن ەميگراتسيانىڭ ەڭ ۇلكەن تولقىنى 1992 جىلدان 2004 جىلعا دەيىنگى كەزەڭ بولعان. ول كەزەڭدە 1,6 ميلليون ادام ەلدەن كەتكەن.

ساراپشىلار قازىرگى ەميگراتسيا تولقىنى رەسەيدىڭ ەكونوميكاسىنا, دەموگرافياسىنا, عىلىمى مەن مادەنيەتىنە اسەر ەتەتىنىن ايتىپ وتىر.