ۋكراينانىڭ قازاقستانداعى جاڭا ەلشىسى تاعايىندالدى

فوتو: اشىق دەرەككوز

ۆلاديمير زەلەنسكي ۋكراينانىڭ قازاقستانداعى جاڭا ەلشىسىن تاعايىندادى. بۇل تۋرالى «ۋكراينسكايا پراۆدا» باسىلىمى حابارلادى, دەپ جازدى qandastar.kz

«پرەزيدەنت ۆلاديمير زەلەنسكي ۋكراينانىڭ قىتايداعى, ليۆانداعى, فينلياندياداعى, نورۆەگياداعى, قازاقستانداعى, ارگەنتيناداعى جانە بۇۇ-داعى جاڭا ەلشىلەرىن تاعايىندادى», – دەپ جازادى باسىلىم.

زەلەنسكيدىڭ جارلىعىمەن ۋكراينانىڭ قازاقستانداعى ەلشىسى بولىپ ۆيكتور مايكو تاعايىندالعان. مايكو بۇعان دەيىن ۋكراينانىڭ تۇرىكمەنستانداعى ەلشىلىگىن باسقارعان.

بۇل ورىن 2022 جىلدان بەرى بوس بولعان. بۇل قىزمەتتى وسىعان دەيىن پەتر ۆرۋبلەۆسكي اتقارعان. 2022 جىلى رەسەي ۋكرايناعا باسىپ كىرىپ, سوعىس باستالعاندا ەلشى «ورىستاردى كوبىرەك قىرۋىمىز قاجەت» دەپ مالىمدەگەن. بۇل وقيعادان كەيىن قازاقستاننىڭ سىرتقى ىستەر مينيسترلىگى ديپلوماتتى شاقىرتىپ, اڭگىمەلەسكەن بولاتىن. ارتىنشا ۆرۋبلەۆسكي ارتىق كەتكەنىن ايتىپ, كەشىرىم سۇرادى.

ال رەسەي تاراپى ديپلوماتتىڭ بۇل مالىمدەمەسىنەن كەيىن, ۆرۋبلەۆسكيگە ىزدەۋ جاريالاپ, سىرتتاي سوتتاپ, 6 جىلعا باس بوستاندىعىنان ايىرۋ جازاسىنا كەستى.