Ýkraınanyń Qazaqstandaǵy jańa elshisi taǵaıyndaldy

Foto: ashyq derekkóz

Vladımır Zelenskıı Ýkraınanyń Qazaqstandaǵy jańa elshisin taǵaıyndady. Bul týraly «Ýkraınskaıa pravda» basylymy habarlady, dep jazdy qandastar.kz

«Prezıdent Vladımır Zelenskıı Ýkraınanyń Qytaıdaǵy, Lıvandaǵy, Fınlıandııadaǵy, Norvegııadaǵy, Qazaqstandaǵy, Argentınadaǵy jáne BUU-daǵy jańa elshilerin taǵaıyndady», – dep jazady basylym.

Zelenskııdiń jarlyǵymen Ýkraınanyń Qazaqstandaǵy elshisi bolyp Vıktor Maıko taǵaıyndalǵan. Maıko buǵan deıin Ýkraınanyń Túrikmenstandaǵy elshiligin basqarǵan.

Bul oryn 2022 jyldan beri bos bolǵan. Bul qyzmetti osyǵan deıin Petr Vrýblevskıı atqarǵan. 2022 jyly Reseı Ýkraınaǵa basyp kirip, soǵys bastalǵanda elshi «orystardy kóbirek qyrýymyz qajet» dep málimdegen. Bul oqıǵadan keıin Qazaqstannyń Syrtqy ister mınıstrligi dıplomatty shaqyrtyp, áńgimelesken bolatyn. Artynsha Vrýblevskıı artyq ketkenin aıtyp, keshirim surady.

Al Reseı tarapy dıplomattyń bul málimdemesinen keıin, Vrýblevskııge izdeý jarııalap, syrttaı sottap, 6 jylǵa bas bostandyǵynan aıyrý jazasyna kesti.