ۇل مەن قىز تاربيەلەيتىن ۇلتتىق باعدارلاما قابىلداۋ كەرەك – دەپۋتات ۇسىنىسى

پارلامەنت ءماجىلىسىنىڭ دەپۋتاتى ارداق نازاروۆ ەلىمىزدە كامەلەتكە تولماعاندار اراسىنداعى قىلمىستىڭ كوبەيىپ بارا جاتقانىنا الاڭداپ, ۇكىمەتكە ناقتى شارالار قابىلداۋدى تالاپ ەتتى. ول بۇل ماسەلەنى تەك قۇقىقتىق شەڭبەردە ەمەس, قوعامنىڭ رۋحاني, مادەني داعدارىسى دەپ باعالادى, دەپ حابارلايدى Qandastar.kz اقپارات پورتالى.

“كەيىنگى جىلدارى ەلىمىزدە كامەلەتكە تولماعاندار مەن جاستار اراسىندا بۇزاقىلىق كوبەيگەنى ءبىزدىڭ قوعامدى قاتتى الاڭداتىپ وتىر. بۇل – تەك قۇقىقتىق ماسەلە عانا ەمەس, بۇل – بۇكىل قوعامنىڭ رۋحاني-مادەني احۋالىن, ونىڭ ىشىندە وتباسىلىق قۇندىلىق پەن مەكتەپتەگى ءتالىم-تاربيەنىڭ السىرەگەنىن كورسەتەتىن الەۋمەتتىك قۇبىلىس”, – دەدى ول پرەمەر-ءمينيستردىڭ ورىنباسارى ەرمەك كوشەرباەۆتىڭ اتىنا جولداعان دەپۋتاتتىق ساۋالىندا.

دەپۋتات ەلدى دۇرلىكتىرگەن بىرنەشە وقيعانى مىسالعا كەلتىردى:

• استانادا 14 جاستاعى بالانىڭ 5 جاستاعى بۇلدىرشىنگە پىشاق الا جۇگىرگەنى;
• سەمەيدە وقۋشىلاردىڭ ءوز قاتارلاسىن ۇرىپ-سوققانى تۇسىرىلگەن ۆيدەو;
• جاڭاوزەندە ليتسەي وقۋشىسىنىڭ سوققىعا جىعىلىپ, اۋرۋحاناعا ءتۇسۋى.

بۇل وقيعالار وقشاۋ ەمەس, جاپپاي ۇردىسكە اينالىپ بارا جاتقانىن ايتقان نازاروۆ باس پروكۋراتۋرانىڭ دەرەگىن العا تارتتى: 2024 جىلى ەلىمىزدە جاسوسپىرىمدەر تاراپىنان 1890 قىلمىس تىركەلگەن. بۇل – كۇنىنە شامامەن 5 بالا قۇقىق بۇزۋشىلىققا بارادى دەگەن ءسوز.

نازاروۆ ءىىم جاريالاعان «قۇقىق بۇزۋشىلىقتىڭ الدىن الۋ جىلىن» قۇپتاعانىمەن, ماسەلە تەك پوليتسيامەن شەشىلمەيتىنىن ايتتى. ونىڭ ايتۋىنشا, قازىر ۋاقىتشا ۇپاي جيناۋ مەن كوزبوياۋشىلىق ەمەس, ۇلت بولاشاعىن ايقىندايتىن ناقتى باعدارلاما قاجەت.

وسى ورايدا, دەپۋتات ۇكىمەتكە ءتورت ناقتى ۇسىنىس جولدادى:

• قۇقىق قورعاۋ, ءبىلىم جانە الەۋمەتتىك قىزمەتتەردىڭ بايلانىسىن كۇشەيتۋ;
• جاسوسپىرىمدەر قىلمىسىنا قاتىستى بىرىڭعاي ستاتيستيكا جۇرگىزۋ;
• پسيحولوگيالىق جانە الەۋمەتتىك قولداۋعا ارنالعان ارنايى باعدارلاما ازىرلەۋ;
• ۇل مەن قىز تاربيەسىنە ارنالعان ۇلتتىق دەڭگەيدەگى كەشەندى باعدارلاما قابىلداۋ.

“ۇرپاق تاربيەلەۋ – ۋاقىتشا ناۋقان ەمەس, مەملەكەتتىڭ ماڭگىلىك مىندەتى”, – دەدى ارداق نازاروۆ.