ۇل تۋمادىڭ دەپ تەپكىلەدى: 10 جىل تۇرمىستىق زورلىققا شىداعان ايەل شىندىقتى ايتتى

فوتو: اشىق دەرەككوز

اقتاۋلىق كەلىنشەك جەلىدە كۇيەۋىنىڭ سوققىلارىنان جاعى قۇرىسىپ, سويلەي الماي قالعانىن مالىمدەپ, دابىل قاقتى. 10 جىل تۇرمىستىق زورلىق-زومبىلىققا شىداعان ايەل سوڭعى رەت ءزابىر كورگەن كەزدە ءتىپتى اياعى باسپاي قالىپ, اۋرۋحاناعا تۇسكەن. بۇل تۋرالى qandastar.kz  Stan.kz-كە سىلتەمە جاساپ حابارلادى. 

6 بالانىڭ اناسى اقسۇڭقار 18 قىركۇيەكتە كۇيەۋىنىڭ سوققىسىنان اۋىر جاعدايدا اۋرۋحاناعا تۇسكەن. سوزىنشە, ەر ادام ونى جازدىق ۇيگە كىرگىزىپ, ىشتەن كىلتتەپ, اياماي ۇرعان.

“ۇنەمى كولىكپەن پروبلەماسى بىتپەيدى. ءبىر كۇنى جول اپاتىن جاساپ, 4 كولىكپەن سوقتىعىستى دا, 1 ميلليون قارىزعا كىردى. ۇيگە كەلىپ, بار اشۋىن مەنەن الدى. وسىنداي جاعدايعا تاپ بولعانىنا مەنى كىنالاپ, جازدىق ۇيگە كىرگىزىپ الىپ, ۇردى. قايىن اپكەم مەن اپا كومەكتەسە الماي, سىرتتا ەسىكتى ءتۇرتىپ تۇردى. مەنى سوققىعا جىعىپ جاتقانىن قىزدارىم دا ەستىپ, سىرتتا شىرىلداپ جىلاپ تۇردى. بىراق ولاردىڭ “قوي” دەگەنىنە قاراماي, ۇرۋىن جالعاستىردى”, – دەدى 27 جاستاعى كەلىنشەك.

ايتۋىنشا, وسىدان كەيىن ايەلدىڭ اياعى باسپاي, جاعى قوزعالماي, بەت-اۋزى, مۇرنى قاناپ دەرەۋ اۋرۋحاناعا جەتكىزىلگەن. بىراق كۇيەۋى اۋرۋحاناداعىلارعا “قۇلاپ قالدى” دەپ ايتقان, ال ايەل سول مەزەتتە جاعى قوزعالماعاسىن ءتىل قاتپاپتى. الايدا قۇربىسىنان كومەك سۇراپ, جازىپ ۇلگەرگەن.

“جاعىم اۋىرىپ, 4 كۇن ءنار تاتپادىم. دارەتحاناعا ادامداردىڭ كومەگىمەن بارىپ ءجۇرمىن. ۇرۋدىڭ ءادىسىن دە ۇيرەنىپ العان. دەنەمە جاراقات ءتۇسىپ, كوگەرىپ قالماسىن دەپ باسىم مەن جاعىمنان ۇرا بەرگەن”, – دەدى ول.

اقسۇڭقار بۇعان دەيىن دە تۇرمىستىق زورلىق-زومبىلىق كورىپ جۇرگەن. ءتىپتى بۇرىن قولىن سىندىرعان دەيدى.

“3 قىزدان كەيىن ۇل جوق دەپ شۋ شىعارادى. موينىما پىشاق سالعان كۇنى دە بولدى. ۇيگە سول كەزدە پوليتسيا شاقىرتتىم, بىراق استى-ۇستىمە ءتۇسىپ, ەندى قاتالامايمىن دەگەن سوڭ كەشىردىم. بىراق تاعى قايتالانىپ وتىر. ەندى كەشىرمەيمىن, اجىراسىپ, ۇرعانى ءۇشىن جازاعا تارتامىن”, – دەدى اقسۇڭقار.

ودان بولەك اقسۇڭقاردىڭ ءبىر قىزىنىڭ قۇلاعىنىڭ مۇكىستىگى بار. قازىر ول قىزىنىڭ وتاسىنا اقشا جيناپ ءجۇر.

كۇيەۋىنىڭ وزبىرلىعىنان شارشاعان كەلىنشەك ادىلدىك سۇرايدى. ول اۋرۋحاناعا تۇسكەن سوڭ پوليتسياعا ارىز جازدى. الايدا كۇيەۋى تەرگەۋ يزولياتورىنا قاماۋعا الىنباپتى.

Stan.kz ءتىلشىسى ماڭعىستاۋ وبلىستىق پوليتسيا دەپارتامەنتىنە ساۋال جولدادى.

“دەنساۋلىققا قاساقانا جەڭىل زيان كەلتiرۋ دەرەگى بويىنشا قىلمىستىق ءىس تىركەلدى. پوليتسيا قاجەتتى تەرگەۋ امالدارىن جان-جاقتى جۇرگىزىپ جاتىر. بولعان وقيعانىڭ ءمان-جايى انىقتالۋدا. ەر ادامعا قاتىستى «ەشقايدا كەتپەۋ» بۇلتارتپاۋ شاراسى قولدانىلدى. وزگە اقپارات تەرگەۋ مۇددەسى ءۇشىن جاريا ەتىلمەيدى”, – دەپ مالىمدەدى ماڭعىستاۋ وبلىستىق پوليتسيا دەپارتامەنتىنىڭ ءباسپاسوز قىزمەتى.