جاڭالىقتار
«ۇل تۋىپ بەر» دەپ كەلىنشەگىن ءولتىرىپ تىندى»: بويجەتكەن اپكەسىنىڭ ولىمىنە جەزدەسىن كىنالادى
سۋرەت: gorsovet.com.ua
دارىگەرلەر ەندى بالا كوتەرسە ءومىرى قىل ۇستىندە بولاتىنىن دا ايتقان ەكەن. ايەلىن كۇيەۋى ۇل تۋىپ بەر دەپ, سوڭىندا ءولتىرىپ تىنعان. بۇل تۋرالى مارقۇمنىڭ ءسىڭلىسى باياندادى, دەپ حابارلايدى KYN.KZ اقپارات اگەنتتىگى Oinet.kz سايتىنا سىلتەمە جاساپ.
«ۇل تۇرماق ءبىر سابيگە زار بوپ جۇرگەندەردىڭ قاتارى كوبەيىپ جاتقاندا 4 بىردەي قىزدى مەنسىنبەي «ۇل كەرەك» دەپ كەرگيتىندەردى تۇسىنبەي-اق قويدىم. اپكەم سونداي تۇسىنىگى تاياز جەزدەمنىڭ تالابىنىڭ قۇربانى بولدى…», – دەيدى ول كوزىنە جاس الىپ.
ايتۋىنشا, تۇرمىسقا شىققان ۇلكەن اپكەسىنە دارىگەرگەر ءۇش بالادان سوڭ-اق بالا تۋعا قارسى بولعان.
«ءۇشىنشى قىزىن تۋعاندا قان قىسىمى قاتتى كوتەرىلىپ كەتىپ, ءبىر ايداي اۋرۋحانادا جاتتى. ودان اكە-شەشەم ۇيگە اكەلىپ قانشا ەمدەتتى. ويتكەنى وزىنە كۇتىم جاساۋعا ۇيىندە جاعدايى جوق بولاتىن. ەنەسى مەن اتاسى بار, كۇيەۋىنىڭ وزىنە ءبىر ادام كەرەك. ءۇش قىزىنا قاراسۋ ءۇشىن انام مەنى جىبەردى. سول كەزدە اپكەمنىڭ قانداي قيىن جاعدايدا جۇرگەنىن كورىپ قاتتى اياپ, ۇيگە ايتىپ كەلگەنىمدە مەنى ەشكىم تىڭداماپ ەدى. نە ىستەسە دە جاقتىرمايتىن قاباعى تىرىسقان ەنەسى, ۇرىسى ءومىرى تاۋسىلمايتىن اتاسى, ولاردىڭ قاباعىن كورىپ ءبارىن ۇيدە وتىرعان اپكەمنەن كورەتىن, قيت ەتسە ۇرىس شىعاراتىن كۇيەۋى تۇرعاندا ساۋ ادامنىڭ دا قان قىسىمى كوتەرىلىپ كەتەتىن شىعار. اتا مەن اجە دەگەن نەمەرەلەرىن ورتالارىنا الىپ, قولىنان ۇستاپ جەتەكتەپ ەرتىپ جۇرەتىن مەيىربان جاندار ەدى مەنىڭ تۇسىنىگىمدە. مەن ول ۇيدە ءۇش اي جاتىپ نەمەرەسىن يىسكەگەن اتا مەن اجە كورمەدىم. قيت ەتسە «ءوشىر انا جالماۋىزدىڭ ءۇنىن, ءومىرى ۇندەرى وشپەيدى, قاشان تاماققا تويادى بۇلار» دەگەن عانا سوزدەر ەستىدىم اۋىزدارىنان. ولارعا قاراپ جيەندەرىمە مەنىڭ جانىم اشيتىن. ءبىر-ەكى رەت قۇداعيعا «نەگە ۇراسىز, بالا عوي» دەپ اراشالاپ قالعانىمدا اپكەم ۇندەمەي جىلاپ قالعان. ال ەنەسى كەشكە بالاسىنا ايتتى. «قۇداشا بيلىگىن جۇرگىزە باستادى عوي مىنا ۇيگە! ءبىر كۇنى شىعىڭدار دەپ وتىرماسىن, ايتەۋىر» دەگەن كۇننىڭ ەرتەڭىنە اپكەمنىڭ كوزى ءىسىپ تۇردى. ابدەن جىلاعانى بەلگىلى ەدى. سوڭىندا شىداي الماي كەتىپ قالدىم», – دەيدى اۆتور.
ءۇش قىزدان كەيىن بالا تۋعا بولمايتىن ايەل تاعى دا قۇرساق كوتەرگەن. الايدا, ومىرگە ءسابي اكەلمەستەن كوز جۇمعان.
«اكە-شەشەمە ايتىپ كەلگەنىمدە «ءۇي بولۋ وڭاي ەمەس قوي, قايتەسىڭ, ارالاسپا» دەگەن كۇيى قالعان. سول اپكەم كۇتىنبەي تاعى ءبىر قىز تۋىپ الدى. ونى پەرزەنتحانادان شىعارۋعا كۇيەۋى كەلمەدى دە. «ۇل تۋمادىڭ» دەپ رەنجىپ جاتقان ءتۇرى ەكەن. اكەم اشۋلانىپ بارىپ ۇيىندەگى ءۇش قىزىن دا الىپ كەلدى. «مەنىڭ قىزىم كەرەك بولماسا, ول تۋعان قىزداردى قايتەيىن دەپ ەدىڭ?» دەپ ۇرسىپ كەتىپتى. اپكەم كىشى قىزىمەن ابدەن قىرقىنان شىعىپ, دەنساۋلىعى تۇزەلگەندە بارىپ كەلىپ كەشىرىم سۇراپ الىپ كەتكەن. بىراق ادام وزگەرمەيدى ەكەن. «جەزدە» دەگىم كەلمەيدى… كۇيەۋى ۇل تۋىپ بەر دەپ قويماپتى. ال دارىگەرلەر ەندى بالا كوتەرسە ءومىرى قىل ۇستىندە بولاتىنىن دا ايتقان ەكەن. بىراق قويسىن با, «قۇداي ساقتاسىن, دارىگەرلەر وتتاي بەرەدى» دەپ قويماعان. ونى ۇلكەن قىزى اناسىن جوقتاپ قىرىق كۇندىك اسىندا جىلاعاندا ايتىپ سالدى ءبارىن. «مامام بولمايدى دەسە دە اپام مەن پاپام قويمادى عوي. بىزگە بالا ەمەس مامام كەرەك ەدى. وعان دارىگەرلەر بولمايدى تۋعا دەپ ايتقان. «جامان ايەل قىز تۋادى» دەپ اپام دا ايتا بەردى. «ۇل كەرەك» دەپ پاپام دا قويمادى… سوسىن عوي مامامنىڭ ءولىپ قالعانى…» دەپ جىلاعاندا اسقا جينالعاننىڭ كوزىنە جاس الماعانى بولماعان شىعار. سونداعى ەنەسىنىڭ ءسوزى نە بولدى دەسەڭىزشى?! «بالا دەگەن وتتاي بەرەدى ەكەن-اۋ, مەن ساپ بەرىپپىن با سونىڭ ىشىنە بالانى?» دەگەندە ايتۋعا ءسوز تاپپادىق. 8-سىنىپ وقيتىن قىز بۇگىندە ءبارىن بىلەدى, تۇسىنەدى ەمەس پە?! ول مۇنداي اڭگىمەنى ويدان شىعارماسا كەرەك. مەن ءوزىم دە «ۇل تۋىپ بەرسەيشى ماعان» دەپ ەكى كۇننىڭ بىرىندە ايتاتىنىن تالاي ءوز قۇلاعىممەن ەسىتتىم ەمەس پە? سودان كەيىن جەزدەمدى كورگىم كەلمەيدى. اپكەمنىڭ قىزدارى ۇيگە ءجيى كەلەدى, شەتىنەن بويجەتىپ كەلە جاتىر. اكەسىمەن تۇرعىسى كەلمەيتىندەرىن سەزەمىز. ۇزاعىراق ءجۇرىپ قالعاندا اكەلەرى كەپ الىپ كەتەدى. سوندايدا جەك كورىپ قارايتىنىمىزدى سەزەدى, ۇيگە كىرمەي دالادا كۇتىپ تۇرادى. ەگەر ول «ۇل-ۇل» دەپ قىلقىلداماي دەر كەزىندە ەمدەتىپ, «ماعان قىزدارىمنىڭ اناسى كەرەك» دەگەندە قازىر باۋىرىپ ورتامىزدا جۇرەر ەدى. اپكەمنىڭ قىزدارىن كورسەم تۋرا ءوزىن كورگەندەي ءىشىم ەلجىرەپ كەتەدى قازىر… , – دەگەن ول تاعى دا كوز جاسىنا ەرىك بەردى. «بۇل قازاق قاشان قىزدى ادام ورنىنا ساناپ ۇيرەنەر ەكەن?!», – دەگەن اششى وكپەسىن دە جەتكىزدى بويجەتكەن…
