جاڭالىقتار
ۇلان رىسقۇل جاڭا قىزمەتكە تاعايىندالدى
فوتو:egov
قازاق كۇرەسىنىڭ بالۋانى ۇلان رىسقۇل جەتىسۋ وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى بولىپ تاعايىندالدى. بۇل تۋرالى وبلىستىق سپورت باسقارماسىنىڭ ءباسپاسوز قىزمەتى مالىمدەدى, دەپ حابارلايدى qandastar.kz
«جەتىسۋ وبلىسى اكىمىنىڭ بۇيرىعىمەن ۇلان رىسقۇل جەتىسۋ وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى بولىپ تاعايىندالدى», – دەلىنگەن اقپاراتتا.
ول بۇعان دەيىن قر تۋريزم جانە سپورت مينيسترلىگىنىڭ سپورت جانە دەنە شىنىقتىرۋ اگەنتتىگىنىڭ دزيۋدودان (ەرلەر) قر ۇلتتىق شتاتتىق كومانداسىنىڭ نۇسقاۋشى-سپورتشىسى, «حالىقارالىق «Qazaq kuresi» فەدەراتسياسى» قاۋىمداستىق نىسانىنداعى زاڭدى تۇلعالار بىرلەستىگىنىڭ باس حاتشىسىنىڭ كەڭەسشىسى, باس حاتشى قىزمەتىن اتقارعان. ال ەڭبەك جولىن اۋەلى استانا قالاسىندا قر مادەنيەت, اقپارات جانە سپورت مينيسترلىگى سپورت ىستەرى كوميتەتىنىڭ «ۇلتتىق شتاتتىق كوماندالار جانە سپورت رەزەرۆى ديرەكتسياسى» رمقك دزيۋدودان (ەرلەر) قر ۇلتتىق شتاتتىق كومانداسىنىڭ نۇسقاۋشى-سپورتشىسى رەتىندە باستاعان.
ەستەرىڭىزدە بولسا, ۇلان رىسقۇل «قازاقستان بارىسى» ءتۋرنيرىنىڭ تۇڭعىش جەڭىمپازى بولعان. ونىڭ ۇستىنە ول دزيۋدودان قازاقستاننىڭ ءۇش دۇركىن چەمپيونى, ازيانىڭ ەكى دۇركىن چەمپيونى, الەم كۋبوگىنىڭ كۇمىس جۇلدەگەرى اتانعان سپورت شەبەرى.
