ءۇلبى وزەنىندە انا مەن بالا سۋعا اعىپ كەتە جازدادى

وسكەمەندە پوليتسيا قىزمەتكەرلەرى ءۇلبى وزەنىندە قاتتى اعىسقا ىلەسىپ كەتكەن انا مەن بالانى قۇتقارىپ قالدى, دەپ جازدى Qandastar.kz Polisia.kz-كە سىلتەمە جاساپ.

17 شىلدە كۇنى ساعات 14:20 شاماسىندا «102» ارناسىنا قالا تۇرعىنى تانىسىنىڭ كىشكەنتاي قىزىمەن بىرگە وزەنگە شومىلىپ جاتقانىن جانە ولاردى اعىس الىپ كەتكەنىن حابارلاعان. حابارعا العاش جەدەل ارەكەت ەتكەن كەزەكشى كومەكشىسى ولجاس ورازوۆ جاقىن ماڭداعى پاترۋلدىك پوليتسيا ەكيپاجىنا ناقتى كوورديناتتار بويىنشا باعىت بەرىپ وتىرعان.

— وقيعا ورنىنا پاترۋلدىك پوليتسيا باتالونى روتاسىنىڭ كومانديرى ماديار مۇحامەدجانوۆ باسقارعان №9 ەكيپاج شۇعىل جەتكەن. سول ساتتە راديوبايلانىس ارقىلى حابار العان ءۇلبى پوليتسيا ءبولىمىنىڭ كريمينالدىق پوليتسيا باستىعىنىڭ ورىنباسارى سۇڭعات سەيىلجانوۆ ءوز بەتىمەن وقيعا ورنىنا جەتىپ, ءبىرىنشى بولىپ سۋعا سەكىرگەن. انا مەن بالانى اعىس وزەننىڭ ورتاسىنا قاراي الىپ كەتكەن ەدى, الايدا وفيتسەر ولاردى ۇستاپ تۇرا الدى, — دەپ جازىلعان اقپاراتتا.

كوپ ۇزاماي قاراما-قارسى جاعادان جەتكەن مۇحامەدجانوۆ كومەككە قوسىلدى. الايدا اعىس قاتتى بولعاندىقتان, ولار ءوز بەتتەرىمەن جاعاعا شىعا المادى. پوليتسەيلەر قۇتقارۋشىلاردىڭ قايىعىن كۇتكەن. ۇيلەسىمدى ارەكەتتىڭ ارقاسىندا قايعىلى جاعدايدىڭ الدى الىندى.

قازىرگى ۋاقىتتا انا مەن بالانىڭ ومىرىنە قاۋىپ جوق. وقيعانىڭ ءمان-جايى انىقتالىپ جاتىر.