ۇلتتىق بانك بازالىق مولشەرلەمەنى تاعى وزگەرىسسىز قالدىردى

قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى كوميتەتى بازالىق مولشەرلەمەنى +/- 1 پ.ت. دالىزىمەن جىلدىق 16,5% دەڭگەيىندە بەلگىلەۋ تۋرالى شەشىم قابىلدادى, دەپ حابارلايدى Qandastar.kz.

شەشىم قابىلدانعاندا ناقتى دەرەكتەر, جاڭارتىلعان بولجامداردى تالداۋ مەن ينفلياتسيا تاۋەكەلدەرىنىڭ بالانسىن باعالاۋ كورسەتكىشتەرى ەسكەرىلدى.

مامىر ايىنىڭ قورىتىندىسى بويىنشا جىلدىق ينفلياتسيا 11,3%-عا جەتتى. سوڭعى ايلاردا باعانىڭ وسۋىننە تۇرتكى بولعان نەگىزگى قوزعاۋشى فاكتور – رەتتەلەتىن تاريفتەر مەن  نارىقتىق قىزمەتتەردىڭ ايتارلىقتاي قىمباتتاۋىنا بايلانىستى سەرۆيستىك ينفلياتسيا  بولىپ وتىر.

باعانىڭ ءوسۋ قارقىنى ازىق-ت ۇلىك تاۋارلارى بويىنشا دا جەدەلدەگەنى بايقالدى. مامىردا ايلىق ينفلياتسيا تاريحي ديناميكادان ايتارلىقتاي اسىپ, 0,9% بولدى.

سىرتقى سەكتور تاراپىنان دا باعاعا قىسىم كۇشەيە ءتۇستى. بۇل رەسەيدەگى جوعارى ينفلياتسيانىڭ ساقتالۋىنا, جوعارى سۇرانىس پەن ۆاليۋتالىق اۋىتقۋلار اياسىندا الەمدىك ازىق-ت ۇلىك باعاسىنىڭ وسە تۇسۋىنە, سونداي-اق ساۋدا قاقتىعىستارىنىڭ كۇشەيۋىنەن جانە شيكىزات تاۋارلارى باعاسىنىڭ قۇبىلمالىلىعىنان تۋىنداعان جوعارى بەلگىسىزدىككە بايلانىستى.

جاھاندىق باعا ورنىقتى تۇردە ءوسۋ ۇردىسىندە قالدى. ساۋدا-ساتتىقتاعى شيەلەنىس ينفلياتسيالىق تاۋەكەلدەردى كۇشەيتىپ, ونەركاسىپ پەن قىزمەت كورسەتۋ سەكتورىندا ىسكەرلىك بەلسەندىلىكتى تەجەي ءتۇستى.

بازالىق ستسەناري اياسىندا Brent ماركالى مۇنايدىڭ باعاسى بولجامدى كەزەڭنىڭ سوڭىنا دەيىن ورتا ەسەپپەن باررەلىنە 60 اقش دوللارىنا دەيىن تومەندەۋ جاعىنا قايتا قارالدى.

قالىپتاسقان جوعارى ينفلياتسيا بۇرىن بولجانعان ۋاقىتتان دا ۇزاق ۋاقىت بويى ۇستامدى قاتاڭ اقشا-كرەديت شارتتارىن ساقتاۋدى تالاپ ەتەدى. تاۋەكەلدەر بالانسى پروينفلياتسيالىق جاققا اۋىسقان. بۇل بازالىق مولشەرلەمەنى 2025 جىلدىڭ سوڭىنا دەيىن قازىرگى دەڭگەيدە ساقتالۋ ىقتيمالدىعىن ارتتىرادى. قالىپتاسقان جاعدايدى ساقتاۋ ينفلياتسيالىق كۇتۋلەردى تۇراقتاندىرۋعا, باعا ءوسىمىنىڭ ۇدەۋىنە جول بەرمەۋگە جانە ينفلياتسيانى 5%-دىق ورتامەرزىمدى ماقساتقا جەتۋ جولىندا ورنىقتى تراەكتورياعا قايتارۋعا باعىتتالعان. ۇلتتىق بانك قاجەت بولعان جاعدايدا بازالىق مولشەرلەمەنى كوتەرۋى دە مۇمكىن, — دەپ مالىمدەدى ۇلتتىق بانك.