ۇلتتىق بانك قازاقستاندىقتاردىڭ زەينەتاقى قورىنداعى اقشاسىنا رەسەيدىڭ مەملەكەتتىك وبليگاتسيالارىن ساتىپ العان

فوتو: اشىق دەرەككوز

ۇلتتىق بانك قازاقستاندىقتاردىڭ زەينەتاقىسىنا رەسەيدىڭ مەملەكەتتىك وبليگاتسيالارىن ساتىپ العان. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

2022 جىلى ۇلتتىق بانك قازاقستاندىقتاردىڭ زەينەتاقى قورىنان 18,8 ملرد تەڭگەگە رەسەيدىڭ قارجى مينيسترلىگىنىڭ دوللارمەن كورسەتىلگەن ەۋرووبليگاتسيالارىن ساتىپ العان. ساتىپ العاننان كەيىن باعالى قاعازداردىڭ قۇنى 385 ميلليون تەڭگەگە تومەندەگەن. بۇل تۋرالى مالىمەت بىرىڭعاي جيناقتاۋشى زەينەتاقى قورىنىڭ (بجزق) 1 تامىزداعى ەسەبىندە كورسەتىلگەن.

ۇلتتىق بانك 2022 جىلعى 1, 2 جانە 3 اقپانداعى, سونداي-اق 4 مامىرداعى رەسەيلىك مەملەكەتتىك وبليگاتسيالاردىڭ بىرنەشە شىعارىلىمىن ساتىپ العان.

اقپان ايىنداعى وبليگاتسيالار 2,1-دەن 6,1 ملرد تەڭگەگە دەيىنگى سوماعا ساتىپ الىنعان جانە 4,25%-دان 12,75%-عا دەيىن پايدا اكەلەدى دەپ بولجانعان. الايدا 1 تامىزداعى جاعداي بويىنشا بۇل باعالى قاعازداردىڭ باعاسى 20-35%-عا تومەندەدى.

ال مامىر ايىندا الىنعان ەكى شىعارىلىم 603 جانە 642 ملن تەڭگەگە ساتىپ الىنعان. قازىر ولاردىڭ قۇنى شامامەن ءتورت ەسەگە – 2,6 جانە 2,7 ملرد تەڭگەگە دەيىن وسكەن.

جالپى العاندا, رەسەيلىك باعالى قاعازدارعا سالىنعان ينۆەستيتسيالار قازاقستان ۇلتتىق بانكىنىڭ سالىستىرمالى تۇردە شاعىن ينۆەستيتسياسى بولىپ تابىلادى. سالىستىرۋ ءۇشىن ۇلتتىق بانك اقش-تىڭ مەملەكەتتىك وبليگاتسيالارىنا 2,14 ترلن تەڭگە ينۆەستيتسيالاعان, بۇگىندە ولاردىڭ قۇنى 2,21 ترلن تەڭگەگە دەيىن ءوستى.

ەسكە سالساق, بۇعان دەيىن زەينەتاقى قورى الاياقتارعا بايلانىستى قازاقستاندىقتارعا ەسكەرتۋ جاساعان ەدى.