ۇلتتىق بانك قازاقستاندىقتارعا حابارلاما جاسادى

فوتو: اشىق دەرەككوز

ۇلتتىق بانك ازاماتتارعا الاياقتار بانكتىڭ رەسمي بلانكىسىن قولدانىپ, جالعان قۇجات ۇسىنعان جاعدايلار جيىلەپ كەتكەنىن ەسكەرتتى, دەپ حابارلادى qandastar.kz

الاياقتار ۇلتتىق بانك اتىنان بايلانىسقا شىققاندا ازاماتتارعا كرەديت شوتى بارىن نەمەسە كرەديت قارىزىن وتەۋى كەرەك ەكەنىن حابارلاپ, جالعان حات جىبەرەدى.

«سەنىمگە كىرۋ ءۇشىن جالعان قۇجاتتارعا ۇلتتىق بانكتىڭ «ۋاكىلەتتى تۇلعاسى» قويعان قولىن, اتى-ءجونى مەن ءمورىن باسادى. قاسكويلەر مۇنداي جالعان مالىمەتتەردى ازاماتتارعا اقشا اۋدارتىپ, قاراجاتىن ۇرلاۋ ءۇشىن دە ۇسىنادى», – دەپ جازىلعان حابارلامادا.

سونداي-اق, ولار ۇلتتىق بانك قىزمەتكەرىنىڭ بەت-بەينەسىن قولدانا وتىرىپ, جالعان بەينەروليكتەر جاساۋ ءۇشىن جاساندى ينتەللەكت تەحنولوگيالارىن پايدالانادى.

«وسىعان بايلانىستى ۇلتتىق بانك ازاماتتاردى قىراعى بولۋعا, كۇماندى شوتتارعا اقشا جىبەرمەۋگە, دايەكسىز حابارلامالار مەن تەكسەرىلمەگەن قۇجاتتارعا سەنبەۋگە شاقىرادى. ۇلتتىق بانك جەكە تۇلعالاردىڭ شوتىنا قىزمەت كورسەتپەيتىنىن, ازاماتتارعا كرەديت بەرۋمەن اينالىسپايتىنىن, زاڭگەرلىك قىزمەت كورسەتپەيتىنىن, سونداي-اق, حالىقپەن ءوزارا اقشالاي ەسەپ ايىرىسۋ جۇرگىزبەيتىنىن ەسكە سالامىز», – دەپ جازىلعان حابارلامادا.

ۇلتتىق بانك ءۇشىنشى تۇلعالار تاراپىنان جاسالاتىن الاياقتىق ارەكەتتەرگە جول بەرمەۋ ءۇشىن مەملەكەتتىك ورگانداردىڭ نەمەسە ۇلتتىق بانك قىزمەتكەرلەرىنىڭ اتىنان بەيتانىس ادام قوڭىراۋ شالعان كەزدە اڭگىمەنى توقتاتىپ, قاجەت بولعان جاعدايدا مەملەكەتتىك ورگاننىڭ رەسمي نومىرىنە ءوز بەتىنشە حابارلاسۋدى ۇسىنادى.

الاياقتىق ارەكەتكە تاپ بولعان جاعدايدا قازاقستان رەسپۋبليكاسىنىڭ قۇقىق قورعاۋ ورگاندارىنا حابارلاسۋ كەرەك. كەڭەس الۋ ءۇشىن ۇلتتىق بانكتىڭ بايلانىس ورتالىعىنا, 1477 قىسقا نومىرىنە حابارلاسقان ءجون.