Ulttyq bank qazaqstandyqtarǵa habarlama jasady

Foto: ashyq derekkóz

Ulttyq bank azamattarǵa alaıaqtar banktiń resmı blankisin qoldanyp, jalǵan qujat usynǵan jaǵdaılar jıilep ketkenin eskertti, dep habarlady qandastar.kz

Alaıaqtar Ulttyq bank atynan baılanysqa shyqqanda azamattarǵa kredıt shoty baryn nemese kredıt qaryzyn óteýi kerek ekenin habarlap, jalǵan hat jiberedi.

«Senimge kirý úshin jalǵan qujattarǵa Ulttyq banktiń «ýákiletti tulǵasy» qoıǵan qolyn, aty-jóni men mórin basady. Qaskóıler mundaı jalǵan málimetterdi azamattarǵa aqsha aýdartyp, qarajatyn urlaý úshin de usynady», – dep jazylǵan habarlamada.

Sondaı-aq, olar Ulttyq bank qyzmetkeriniń bet-beınesin qoldana otyryp, jalǵan beınerolıkter jasaý úshin jasandy ıntellekt tehnologııalaryn paıdalanady.

«Osyǵan baılanysty Ulttyq bank azamattardy qyraǵy bolýǵa, kúmándi shottarǵa aqsha jibermeýge, dáıeksiz habarlamalar men tekserilmegen qujattarǵa senbeýge shaqyrady. Ulttyq bank jeke tulǵalardyń shotyna qyzmet kórsetpeıtinin, azamattarǵa kredıt berýmen aınalyspaıtynyn, zańgerlik qyzmet kórsetpeıtinin, sondaı-aq, halyqpen ózara aqshalaı esep aıyrysý júrgizbeıtinin eske salamyz», – dep jazylǵan habarlamada.

Ulttyq bank úshinshi tulǵalar tarapynan jasalatyn alaıaqtyq áreketterge jol bermeý úshin memlekettik organdardyń nemese Ulttyq bank qyzmetkerleriniń atynan beıtanys adam qońyraý shalǵan kezde áńgimeni toqtatyp, qajet bolǵan jaǵdaıda memlekettik organnyń resmı nómirine óz betinshe habarlasýdy usynady.

Alaıaqtyq áreketke tap bolǵan jaǵdaıda Qazaqstan Respýblıkasynyń quqyq qorǵaý organdaryna habarlasý kerek. Keńes alý úshin Ulttyq banktiń baılanys ortalyǵyna, 1477 qysqa nómirine habarlasqan jón.