Ulttyq bank tóraǵasy kóshelerdegi valıýta baǵamy kórsetilgen taqtalar týraly: bul 90-shy jyldardaǵy anahronızm

Foto: pixabay

Qazaqstan Respýblıkasynyń Ulttyq bankiniń tóraǵasy Tımýr Súleımenov kóshelerdegi valıýta baǵamdaryn kórsetetin taqtaıshalardy alyp tastaýdy usyndy, dep habarlaıdy  qandastar.kz  Zakon.kz-ke silteme jasap.

Ol kósheler men joldarda shetel valıýtalarynyń baǵamdary kórsetiletin aıyrbastaý pýnktterin 90-jyldardyń anahronızmi dep atady.

«90-jyldary qarjylyq júıe bolmaǵan kezde, únemdeýge múmkindik joq edi: depozıtter de bolmady. Kez kelgen jınaq jasaý múmkindigi – bul tek dollar satyp alý bolatyn. Ol kezde bul taqtaıshalar mańyzdy bolatyn. Aqsha aýystyrý úshin Qytaıǵa nemese basqa jaqqa barý kerek boldy… Qazirgi ýaqytta munyń qajeti joq», – dedi Ulttyq bank tóraǵasy.

Ol memleket, bıznes, qoǵamnyń ózi dollarsyzdandyrý úshin kóp nárse jasaǵanyn atap ótti.

«Biz depozıtterdi dollarsyzdandyrýǵa qol jetkizdik. Jeti-segiz jyl buryn depozıtterdiń 70%-y dollarda bolatyn, qazir tek 22%-y. Bizdiń barlyq marketpleısterimiz, jarnamalarymyz, baǵa belgilerimiz – teńgemen… … Endeshe barlyq dúkender kóshege ózderiniń baǵa taqtaıshalaryn ilsin: sút – 450, nan – 150, kartop – 300. О́ıtkeni bul da kúndelikti tutynatyn taýarlar, men de 300 teńgege kartopty qaıdan satyp alýǵa bolatynyn, qaıdan 350 nemese 280 teńgege satyp alýǵa bolatynyn bilgim keledi. Biraq eshkim muny istemeıdi. 90-jyldardaǵy anahronızm tek aıyrbastaý pýnktteriniń taqtalarynda saqtalyp qaldy. Qazirgi qoǵam men ekonomıka deńgeıine sáıkes keletin ýaqyt keldi», – dep túsindirdi Tımýr Súleımenov.

Ol sondaı-aq ovalıýta baǵamy boıynsha alypsatarlyq táýekelderi týraly máseleni túsindirdi.

«Qazir eshkim kólikpen nemese avtobýspen júrip, taqtaıshalardy izdemeıdi. Barlyǵy bank qosymshalaryn, kurs.kz saıttaryn ashady. Sondyqtan bizge shetel valıýtasynyń baǵa belgileri qajet emes», – dedi ol.