ءبىلىم
ۇلتتىق بىرىڭعاي تەستىلەۋ باستالدى
فوتو: اشىق دەرەككوز
بۇگىن بۇكىل قازاقستان بويىنشا 2025 جىلعى ءبىرىنشى ۇلتتىق بىرىڭعاي تەستىلەۋ باستالدى. ول 10 اقپانعا (قوسا العاندا) دەيىن جالعاسادى, دەپ جازدى qandastar.kz
جوعارى ءبىلىم جانە عىلىم مينيسترلىگىنىڭ مالىمەتىنشە ۇبت-عا 167 مىڭعا جۋىق ادام ءوتىنىش بەرگەن, بۇل وتكەن جىلمەن سالىستىرعاندا 31 مىڭعا كوپ.
ءوتىنىش بەرگەندەردىڭ باسىم بولىگى ماتەماتيكا-فيزيكا, بيولوگيا-حيميا بەيىندىك پاندەر كومبيناتسياسىن تاڭداعان بولسا, ەڭ ازىنىڭ تاڭداۋى ورىس ءتىلى-ورىس ادەبيەتى, حيميا-فيزيكا كومبيناتسياسىنا تۇسكەن.
ەسكە سالايىق, ۇبت-داعى پاندەردىڭ سانى وزگەرىسسىز قالادى, ياعني ۇشەۋى مىندەتتى جانە ەكەۋى تاڭداۋ بويىنشا. ۇبت تاپسىرمالار سانى – 120. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بالل – 140, ول دا وزگەرىسسىز قالدى.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
