ۇلتتىق دومبىرا كۇنى الماتىدا قالاي تويلانادى?

الماتىدا 7 شىلدە كۇنى ساعات 20.00-دە اباي الاڭىندا ۇلتتىق دومبىرا كۇنىنە وراي «اڭىز دومبىرا» مەرەكەلىك كونتسەرتى وتەدى, دەپ حابارلادى قالا اكىمدىگىنىڭ ءباسپاسوز قىزمەتىنە سىلتەمە جاساپ Informburo.kz.
مەرەكەلىك باعدارلاما اياسىندا روزا رىمباەۆا, ماقپال ءجۇنىسوۆا, سەكەن تۇرىسبەك, ايگۇل قوسانوۆا, اسىلبەك ەڭسەپوۆ, شولپان دارجانوۆا, ءابدىلحاميت رايىمبەرگەنوۆ, نۇركەن ءاشىروۆ, ارداق بالاجانوۆا, نۇرجان جانپەيىسوۆ, «قوڭىر» توبى, «سازگەن» فولكلورلىق-ەتنوگرافيالىق ءانسامبلى, «سالتانات» بي ءانسامبلى ونەر كورسەتەدى.
سونىمەن قاتار كونتسەرتە – كەنەن ازىرباەۆ, تولەگەن مومبەكوۆ, اسەت بەيسەۋوۆ, مەيرامبەك جانبولاتوۆتىڭ شىعارمالارى ورىندالادى. ءىس-شارا اياسىندا قازاق حالىق اسپاپتارى شەبەرلەرىن – تالانتتى قولونەرشىلەردى ەستەلىك سىيلىقتارمەن ماراپاتتاۋ وتەدى.
ۇلتتىق دومبىرا كۇنى قالانىڭ باسقا اۋداندارىندا دا مەرەكەلەنەدى:

الاتاۋ اۋدانىندا 4 شىلدە كۇنى ساعات 15.00-دە Alatau Creative Hub – الماتى كىتاپحاناسىندا قازاقستان حالقى اسسامبلەياسىمەن بىرلەسكەن ءىس-شارا وتەدى. مەرەكەلىك باعدارلامادا شىعارماشىلىق ۇجىمدار ءسوز سويلەيدى. اتالمىش شارانىڭ باستى ماقساتى – ەتنوسارالىق قاتىناستاردى نىعايتۋ جانە قازاق مادەنيەتىن ناسيحاتتاۋ. سونىمەن قاتار 5 شىلدەدە ساعات 11.00-دە مۋلتيمەديالىق ءداستۇرلى مۋزىكانىڭ ورتالىعىندا «قازاعىمنىڭ جۇرەگىنەن جارالعان, بابامىزدىڭ ءۇنىسىڭ سەن – دومبىرا!» كونتسەرتتىك باعدارلاماسى ۇيىمداستىرىلادى.
اۋەزوۆ اۋدانىندا 5 شىلدەدە ساعات 11.00-دە «Family» ساياباعىندا كونتسەرت ءوتىپ, ەسترادا ارتيستەرى قۇرمانعازى, داۋلەتكەرەي جانە تاتتىمبەت شىعارمالارىن ورىندايدى. سونىمەن قاتار «سارىارقا» سكۆەرىندە ساعات 11.00-دەن 16.00-گە دەيىن قولونەر جارمەڭكەسى وتەدى;
بوستاندىق اۋدانىندا 5 شىلدە كۇنى ساعات 14.00-دە «Mega Alma-Ata» سوو اۋماعىندا ۇلتتىق دومبىرا كۇنىن تويلاۋ قۇرمەتىنە «كۇمبىرلە قوڭىر دومبىرا» مەرەكەلىك باعدارلاماسى وتەدى;
مەدەۋ اۋدانىندا 4 شىلدە كۇنى ساعات 12.00-دە نۇرعيسا تىلەنديەۆ مەموريالدىق مۋزەيىنە كەلۋشىلەر ءداستۇرلى جانر ارتيستەرىنىڭ قاتىسۋىمەن «سيقىرلى ءۇنى» كونتسەرتىن كورە الادى. سونىمەن قاتار ساعات 11.00-دە ىقىلاس اتىنداعى حالىق مۋزىكالىق اسپاپتار مۋزەيىندە Dombyra fest فلەشموبى وتەدى.
ناۋرىزباي اۋدانىندا 5 شىلدە كۇنى ساعات 11.00-دە شۇعىلا, 347/4 مەكەنجايىنداعى يننوۆاتسيالىق شىعارماشىلىق ورتالىعىندا مەرەكەگە وراي كونتسەرتتىك باعدارلاما بولادى.
تۇركسىب اۋدانىندا 5 شىلدە كۇنى ساعات 17.00-دە ساۋرانباەۆ كوشەسىندەگى ارباتتا دومبىرا كۇنىنە ارنالعان «التىن دومبىرا» دومبىراشىلاردىڭ فلەشموبى وتەدى.