ۇلتتىق ەكونوميكا مينيسترلىگى دەپۋتاتتىڭ قىمباتشىلىق تۋرالى جازباسىنا جاۋاپ بەردى

فوتو: gov.kz

دەپۋتات اسحات ايماعامبەتوۆ سالىق كودەكسىندەگى قىمباتشىلىق تۋدىراتىن نورماعا ەرەكشە توقتالىپ, وعان ۇلتتىق بانكتەن باستاپ, قارجىگەرلەر قاۋىمداستىعى, ساراپشىلار, ءتىپتى «اتامەكەن» ۇلتتىق كاسىپكەرلەر پالاتاسى دا قارسى بولىپ جاتقانىنا قاراماستان ونىڭ قابىلدانۋ ىقتيمالدىلىعى جوعارى ەكەنىن ايتادى.ەڭ باستىسى, بۇل نورما قابىلدانسا, بانكتىك اقشا اۋدارىمدارى 12%-عا قىمباتتاپ ءارى ءار ازاماتقا ايتارلىقتاي اسەر ەتەتىن بولادى, دەپ حابارلايدى qandastar.kz

«كارتادان باسقا كارتاعا اقشا اۋدارعانى ءۇشىن كوميسسيا 150 تەڭگە بولدى. ال ەندى, جاڭا سالىق كودەكسى جوباسىندا ۇسىنىلعان نورما قابىلدانسا, مۇنداي اۋدارىمدار شامامەن 12%-عا قىمباتتاۋى مۇمكىن. بۇل – ەكونوميكا مينيسترلىگىنىڭ تولەم وپەراتسيالارىن ققس-قا (ندس) سالۋعا قاتىستى جوسپارى. پلاستيكالىق كارتوچالاردى پايدالانۋ, كارتوچادان كارتوچكاعا اۋدارىمدار, شوتتان شوتقا اۋدارىمدار, تولەمدەر مەن بانكتىك قىزمەتتەر ايتارلىقتاي قىمباتتاۋى مۇمكىن. ەكونوميكا مينيسترلىگى بۇل شىعىنداردى بانكتەر وزدەرى جابادى دەپ مالىمدەيدى, بىراق اشىعىن ايتساق – بۇل شىندىققا جاناسپايدى», – دەپ جازدى اسحات ايماعامبەتوۆ Telegram-داعى ارناسىندا.

Dalanews.kz. بۇل نورماعا 🫵ۇلتتىق بانك, قارجىگەرلەر قاۋىمداستىعى, ساراپشىلار, ءتىپتى «اتامەكەن» ۇلتتىق كاسىپكەرلەر پالاتاسى دا قارسى شىققانىن, سوعان قاراماستان, ۇلتتىق ەكونوميكا مينيسترلىگى بۇل نورمانى سالىق كودەكسى جوباسىنا قوسىپ وتىرعانىنا باسا نازار اۋدارتادى.

«مۇنداي وزگەرىستەر تەك ءبىزدىڭ شىعىندارىمىزدى كوبەيتىپ قانا قويمايدى, سونىمەن قاتار قارجى جۇيەسىنە دەگەن سەنىمدى دە السىرەتەدى. بۇل باستاما ءاربىر ازاماتقا اسەر ەتەدى. ءبىز بۇل نورمانى وزگەرتۋ ءۇشىن ءوز تۇزەتۋلەرىمىزدى ەنگىزدىك. حالىقتىڭ موينىنا وسىنداي سالىق جۇكتەۋدى ءادىل دەپ ساناۋعا بولا ما», – دەيدى دەپۋتات.

دەپۋتاتتىڭ بۇل جازباسى قوعامدا رەزونانس تۋعىزعاننان كەيىن قۇزىرلى ۆەدومستۆو بۇعان قاتىستى تۇسىنىكتەمە بەرۋگە ءماجبۇر بولدى.

ازاماتتاردىڭ بانكتىك اۋدارىمدارىنا قوسىلعان قۇن سالىعىنا سالىق سالۋ تۋرالى اقپاراتتىڭ تارالۋىنا بايلانىستى قر ۇلتتىق ەكونوميكا مينيسترلىگى مىنانى حابارلايدى:

«ياعني, بانكتەر ءوز قىزمەتتەرى ءۇشىن كليەنتتەردەن الاتىن كوميسسيالارعا سالىق سالۋ (ققس) جونىندە ايتىپ وتىرمىز. مىسالى, كارتانى شىعارۋ ءۇشىن نەمەسە اۋدارىمدار ءۇشىن بانك الاتىن كوميسسيالار. جاڭا سالىق كودەكسىنىڭ جوباسىندا ەكىنشى دەڭگەيدەگى بانكتەردىڭ قارجىلىق وپەراتسيالارىنا قولدانىستاعى جەڭىلدىكتى جويۋ جونىندەگى نورما ۇسىنىلادى. ازاماتتار جۇزەگە اسىراتىن اۋدارىمداردىڭ وزىنە سالىق سالىنبايدى. ەگەر ءبىر بانكتىڭ ىشىندەگى اقشا اۋدارىمدارى كوميسسياسىز جۇزەگە اسىرىلسا, تيىسىنشە مۇنداي جاعدايلاردا سالىق سالىنبايدى. جاڭا سالىق كودەكسىنىڭ جوباسى تالقىلاۋ ساتىسىندا تۇرعاندىعىن ەسكە سالا كەتەيىك. ۇسىنىلعان نورمالار پارلامەنتتە, بيزنەس-قوعامداستىقپەن جانە جۇرتشىلىقپەن تالقىلانۋدا», دەلىنگەن تۇسىنىكتەمەدە.

سونداي-اق كودەكستىڭ سوڭعى جوباسى 2025 جىلى قابىلداناتىنى ەسكە سالىنادى. ياعني, بۇل نورما ءالى قابىلدانعان جوق, ءالى تالقىلاۋ دەڭگەيى بارىسىندا.

مينيسترلىك ۇسىنعان تۇسىنىكتەمەنى ءبىر سويلەممەن جەتكىزسەك, ولار بۇل نورما قابىلدانعان جاعدايدا سالماق استە قاراپايىم ەل ازاماتتارىنا ەمەس, بانك سەكتورىنا تۇسەتىنىن باسا كورسەتەدى.

ال ءماجىلىس دەپۋتاتى اسحات ايماعامبەتوۆ مۇنىمەن ەش كەلىسپەيدى:

«بانكتەر ەشقاشان شىعىنداردى ءوز ەسەبىنەن جاۋىپ قالمايدى. ولار مىندەتتى تۇردە بۇل شىعىنداردى كليەنتتەردىڭ موينىنا ارتاتىن بولادى. ويتكەنى بانكتەر – قايىرىمدىلىق ۇيىمدارى ەمەس».

ايتا كەتسەك, ۇلتتىق ەكونوميكا ۆيتسە-ءمينيسترى ازامات امرين 29 قاراشادا ءماجىلىس قابىرعاسىندا جاڭا سالىق كودەكسى جوباسىن تانىستىرا وتىرىپ, 128 سالىقتىق جەڭىلدىكتى الىپ تاستاۋ ۇسىنىلعانىن ايتتى. ونىڭ ايتۋىنشا, مەملەكەت باسشىسى سالىقتىق جەڭىلدىكتەردى 20 پايىزعا قىسقارتۋ تۋرالى تاپسىرما بەرگەن.