جاڭالىقتار
ۇلتتىق قورعانىس ۋنيۆەرسيتەتىنىڭ پولكوۆنيگى ايەل زورلادى دەپ كۇدىككە ءىلىندى
فوتو: اشىق دەرەككوز
استانادا قورعانىس مينيسترلىگىنە قاراستى ۇلتتىق قورعانىس ۋنيۆەرسيتەتىندە قىزمەت ەتەتىن پولكوۆنيك شەنىندەگى اسكەري قىزمەتكەر ءبىر ايەلدى زورلادى دەپ كۇدىككە ءىلىندى, دەپ حابارلايدى qandastar.kz Orda.kz-كە سىلتەمە جاساپ.
وقيعا 2025 جىلى 8 شىلدەدە شامامەن ساعات 20:00-دە بولعان. جابىرلەنۋشى سول كۇنى كۇدىكتىنىڭ شاقىرۋىمەن ونىڭ اسكەري قالاشىقتاعى ۇيىنە بارعان. ۇيدە تاعى ءبىر ەر ادام بولعان. ولار بىرگە ىشىمدىك ىشكەن. سول كەزدە وعان جىنىستىق زورلىق كورسەتكەن.
زارداپ شەككەن ايەل وقيعا ورنىنان قاشىپ شىعىپ, دەرەۋ 102 نومىرىنە حابارلاسقان.
جابىرلەنۋشى پوليتسياعا بەرگەن تۇسىنىكتەمەسىندە كۇدىكتىمەن 2019–2023 جىلدار ارالىعىندا جاقىن قارىم-قاتىناستا بولعانىن ايتقان.
«قازىر سوتقا دەيىنگى تەرگەۋ ءجۇرىپ جاتىر. وقيعانىڭ ءمان-جايى انىقتالىپ جاتىر», – دەپ حابارلادى «وردا» تىلشىلەرىنە استانا قالاسىنىڭ پوليتسيا باسقارماسى.
قازىرگى ۋاقىتتا ءىس بويىنشا تەرگەۋ امالدارى جۇرگىزىلىپ جاتىر.
