ۇلتتىق قۇراما اسحات تاعىبەرگەنمەن رەسمي قوشتاسادى

2026 جىلعى الەم چەمپيوناتىنىڭ ىرىكتەۋ كەزەڭىندەگى قازاقستان – ۋەلس ماتچىنىڭ ۇزىلىسىندە ۇلتتىق قۇرامانىڭ بۇرىنعى ويىنشىلارى اسحات تاعىبەرگەن مەن الەكساندر ماروچكينگە ارنالعان رەسمي قوشتاسۋ ءراسىمى وتەدى, دەپ حابارلايدى Qandastar.kz 1bol.kz cايتىنا سىلتەمە جاساپ. 

ايتا كەتەيىك, بيىل قوس فۋتبولشى قازاقستان قۇراماسىنداعى مانسابىن اياقتاعان بولاتىن. اسحات تاعىبەرگەن ىرىكتەۋ ءتۋرنيرىنىڭ ءۇشىنشى تۋرىندا وتكەن قازاقستان – سولتۇستىك ماكەدونيا كەزدەسۋىنەن (0:1) كەيىن حالىقارالىق كارەراسىن ءتامامدادى. ال الەكساندر ماروچكين ءوز شەشىمىن ليحتەنشتەين – قازاقستان ماتچىنان (0:2) كەيىن جاريالاعان ەدى.

ۇلتتىق قۇراما ساپىندا ۇزاق جىلدار ونەر كورسەتكەن قوس ويىنشىعا جانكۇيەرلەر الدىندا قۇرمەت كورسەتىلىپ, رەسمي تۇردە شىعارىپ سالۋ ءراسىمى ۇيىمداستىرىلادى.

بۇعان دەيىن اسحات تاعىبەرگەن ۇلتتىق قۇرامادان نەگە كەتكەنىن اشىپ ايتقان ەدى.

«سولتۇستىك ماكەدونياعا قارسى ماتچ – مەنىڭ ۇلتتىق قۇراماداعى سوڭعى ويىنىم. بۇل مەنىڭ جانە وتباسىممەن بىرگە اقىلداسقان شەشىمىم. ەندى جاستارعا جول بەرۋ كەرەك. ويتكەنى فۋتبول – باسەكەگە تولى سپورت. قازىر بۇل تۋرالى كوپ ايتىلىپ جاتىر. جالپى جاس دەگەن – تەك پاسپورتتاعى سان. بىراق مەن قازىر ءوزىمدى بۇل ورىندى بوساتۋعا دايىنمىن دەپ سانايمىن. بۇگىن ۇلتتىق قۇراما ساپىنداعى سوڭعى ويىنىمدى وتكىزدىم. ەندى فۋتبولداعى مانسابىمدى كلۋب دەڭگەيىندە جالعاستىرامىن. بارلىق ماتچتار جۇرەككە جاقىن قابىلدادىم. اسىرەسە «استانا ارەناداعى» 30 مىڭ جانكۇيەردىڭ قولداۋى – ۇمىتىلماس اسەر. قولداعان جانكۇيەرلەرگە مىڭ العىس. بارشاڭىزعا اللا رازى بولسىن. ۇلتتىق قۇرامانىڭ ءبىر بولشەگى بولعانىما, كاپيتانى بولعانىما وتە قۋانىشتىمىن. راقمەت!», – دەدى اسحات.