Ulttyq qurama Ashat Taǵybergenmen resmı qoshtasady

2026 jylǵy álem chempıonatynyń irikteý kezeńindegi Qazaqstan – Ýels matchynyń úzilisinde ulttyq quramanyń burynǵy oıynshylary Ashat Taǵybergen men Aleksandr Marochkınge arnalǵan resmı qoshtasý rásimi ótedi, dep habarlaıdy Qandastar.kz 1bol.kz caıtyna silteme jasap. 

Aıta keteıik, bıyl qos fýtbolshy Qazaqstan quramasyndaǵy mansabyn aıaqtaǵan bolatyn. Ashat Taǵybergen irikteý týrnıriniń úshinshi týrynda ótken Qazaqstan – Soltústik Makedonııa kezdesýinen (0:1) keıin halyqaralyq karerasyn támamdady. Al Aleksandr Marochkın óz sheshimin Lıhtenshteın – Qazaqstan matchynan (0:2) keıin jarııalaǵan edi.

Ulttyq qurama sapynda uzaq jyldar óner kórsetken qos oıynshyǵa jankúıerler aldynda qurmet kórsetilip, resmı túrde shyǵaryp salý rásimi uıymdastyrylady.

Buǵan deıin Ashat Taǵybergen ulttyq quramadan nege ketkenin ashyp aıtqan edi.

«Soltústik Makedonııaǵa qarsy match – meniń ulttyq quramadaǵy sońǵy oıynym. Bul meniń jáne otbasymmen birge aqyldasqan sheshimim. Endi jastarǵa jol berý kerek. О́ıtkeni fýtbol – básekege toly sport. Qazir bul týraly kóp aıtylyp jatyr. Jalpy jas degen – tek pasporttaǵy san. Biraq men qazir ózimdi bul oryndy bosatýǵa daıynmyn dep sanaımyn. Búgin ulttyq qurama sapyndaǵy sońǵy oıynymdy ótkizdim. Endi fýtboldaǵy mansabymdy klýb deńgeıinde jalǵastyramyn. Barlyq matchtar júrekke jaqyn qabyldadym. Ásirese «Astana Arenadaǵy» 30 myń jankúıerdiń qoldaýy – umytylmas áser. Qoldaǵan jankúıerlerge myń alǵys. Barshańyzǵa Alla razy bolsyn. Ulttyq quramanyń bir bólshegi bolǵanyma, kapıtany bolǵanyma óte qýanyshtymyn. Raqmet!», – dedi Ashat.