ۇلتتىق قۇرىلتاي جۇمىس سەكتسيالارىنىڭ وتىرىستارى ءوتتى

اقوردا ءباسپاسوز قىزمەتىنىڭ حابارلاۋىنشا, اتالعان سەكتسيالارعا پرەزيدەنتتىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى رۋسلان جەلدىباي, مادەنيەت جانە اقپارات ءمينيسترى ايدا بالاەۆا مەن عىلىم جانە جوعارى ءبىلىم ءمينيسترى ساياسات نۇربەك مودەراتور بولدى. سونداي-اق سەكتسيالاردىڭ جۇمىسىنا وقۋ-اعارتۋ ءمينيسترى عاني بەيسەمباەۆ قاتىستى.

جيىندا ۇلتتىق قۇرىلتاي توراعاسىنىڭ ورىنباسارى – مەملەكەتتىك كەڭەسشى ەرلان قارين ۇلتتىق قۇرىلتايدىڭ بيىلعى قىزمەتىنىڭ نەگىزگى باعىتتارى پرەزيدەنتتىڭ قاڭتار ايىندا Ana tili گازەتىنە بەرگەن سۇحباتىندا جانە ۇكىمەتتىڭ كەڭەيتىلگەن وتىرىسىندا سويلەگەن سوزىندە ايقىندالعانىن ايتتى.

مەملەكەتتىك كەڭەسشى جۇرگىزىلىپ جاتقان رەفورمالاردىڭ ماڭىزدىلىعىن اتاپ ءوتتى.

«بۇگىندە مەملەكەت باسشىسىنىڭ باستاماسىمەن جانە باسشىلىعىمەن مەملەكەتتىگىمىزدى دامىتۋدى جانە ۇلتتىق ەكونوميكانىڭ نەگىزدەرىن نىعايتۋدى كوزدەيتىن اسا ماڭىزدى رەفورمالار جۇيەلى تۇردە جۇزەگە اسىرىلىپ جاتىر. ءبىز قازىردىڭ وزىندە بۇل رەفورمالاردىڭ ناقتى ناتيجەسىن كورىپ وتىرمىز. ەلىمىزدە ينجەنەرلىك جەلىلەر مەن كوممۋنالدىق شارۋاشىلىق نىساندارى بارىنشا جاڭارتىلىپ جاتىر. ەنەرگەتيكا سالاسىندا ءىرى جوبالار ىسكە اسىرىلۋدا. بارلىق ايماقتا مىڭداعان شاقىرىم كولىك جانە تەمىر جولدارىن جوندەۋ جانە سالۋ جۇمىستارى قولعا الىندى. بىرقاتار قالادا اۋەجايدىڭ ەسكى تەرمينالى جاڭارتىلىپ, جاڭا تەرمينال ىسكە قوسىلدى. نەگىزىنەن مەملەكەت قولداۋىنىڭ ارقاسىندا اۋىل شارۋاشىلىعى قىزمەتكەرلەرى رەكوردتىق كولەمدە استىق جينادى. تۇرعىن ءۇي قۇرىلىسى, ونىڭ ىشىندە الەۋمەتتىك تۇرعىن ءۇي قۇرىلىسى قارقىندى دامىپ كەلەدى. مەملەكەت تاراپىنان عىلىم مەن ءبىلىمدى قولداۋ ءۇشىن بۇرىن-سوڭدى بولماعان شارالار قولعا الىندى. قوعامدا پەداگوگتەردىڭ, دارىگەرلەردىڭ, عالىمداردىڭ مارتەبەسى, جۇمىسشى ماماندىقتاردىڭ ابىروي-بەدەلى ارتىپ كەلەدى. جاستاردى تۇراقتى تۇردە قولداۋعا, بۇقارالىق سپورتتى جانە كرەاتيۆتى يندۋستريانى دامىتۋعا ايرىقشا نازار اۋدارىلىپ وتىر. مۇنىڭ ءبارى – باستالعان وزگەرىستەر مەن قول جەتكىزگەن جەتىستىكتەردىڭ از عانا بولىگى. پرەزيدەنت ۇسىنعان باستامالاردىڭ كوبىسىن جۇزەگە اسىرۋعا ۇلتتىق قۇرىلتاي مۇشەلەرى زور ۇلەس قوسىپ كەلەدى. بۇل – مەملەكەت پەن قوعامنىڭ ءوزارا ءتيىمدى ىقپالداستىعىنىڭ ءبىر كورىنىسى», –دەدى ەرلان قارين.

جۇمىس سەكتسيالارىنىڭ وتىرىستارىندا ۇلتتىق قۇرىلتاي مۇشەلەرىنىڭ باستامالارى مەن ۇسىنىستارىنىڭ ورىندالۋ بارىسى قارالدى. سونىمەن قاتار ازاماتتىق قوعامدى دامىتۋ جانە بەرەكەلى بىرلىكتى نىعايتۋ, ادام قۇقىقتارىن قورعاۋ, مادەني-رۋحاني دامۋ, الەۋمەتتىك ماسەلەلەردى شەشۋ سالاسىنا قاتىستى ويلارىن ورتاعا سالدى.

جيىن سوڭىندا مودەراتورلار تالقىلاۋ كەزىندە كوتەرىلگەن باستامالاردى قۇرىلتاي حاتشىلىعى ءتورتىنشى وتىرىسقا دايىندىق بارىسىندا پىسىقتاپ, جۇيەلەيتىنىن اتاپ ءوتتى.