ۇلتتىق قۇرىلتايدىڭ IV وتىرىسى: ءبىرىنشى كۇنگى تالقىلاۋلار مەن كوتەرىلگەن ماسەلەلەر

ەكى كۇندىك كەزدەسۋدە قۇرىلتاي مۇشەلەرى ەلدىڭ دامۋ باعىتىن ايقىندايتىن وزەكتى ماسەلەلەردى تالقىلايدى.

ءىس-شارانىڭ ءبىرىنشى كۇنىندە وتكەن سەكتسيالاردىڭ تاقىرىپتارى:

• ازاماتتىق قوعام;
• مادەنيەت. ونەر. رۋحانيات;
• ءبىلىم جانە عىلىم;
• الەۋمەتتىك-ەكونوميكالىق دامۋ.

«ازاماتتىق قوعام» سەكتسياسىنا قر پرەزيدەنتىنىڭ ىشكى ساياسات جانە كوممۋنيكاتسيالار ماسەلەلەرى جونىندەگى كومەكشىسى ارمان قىرىقباەۆ توراعالىق ەتتى.  وعان قاتىسۋشىلار زاڭ ۇستەمدىگى, حالىقتىڭ قۇقىقتىق ساۋاتى, اسكەردەگى الىمجەتتىك, ەكولوگيالىق مادەنيەت جانە ءتىل مەن ءدىن ماسەلەسىن قوزعاپ, ازاماتتىق قوعام ينستيتۋتتارىنىڭ ءرولىن نىعايتۋعا قاتىستى ۇسىنىستارىن ورتاعا سالدى.

اتالعان تالقىلاۋ الاڭىندا قۇرىلتاي مۇشەلەرى يدەولوگيا ىسىنە قاتىستى پىكىرلەرىن ورتاعا سالدى. اتاپ ايتساق, وتباسى قۇندىلىقتارىن نىعايتۋ, قازاقشا كونتەنتتى دامىتىپ, ءتىلىمىزدىڭ قولدانۋ اياسىن كەڭەيتۋ, ەلدەگى تاريحي-مادەني نىسانداردى قورعاۋ, وڭىرلەردەگى قالامگەرلەردىڭ شىعارماشىلىعىن ناسيحاتتاۋ جانە باسپا ءىسىن جۇيەلەۋ تۋرالى كەلەلى ۇسىنىستار ايتىلدى.

ۇلتتىق قۇرىلتايدىڭ ء«بىلىم جانە عىلىم» اتتى ءۇشىنشى سەكتسياسىنىڭ مودەراتورى — عىلىم جانە جوعارى ءبىلىم ءمينيسترى ساياسات نۇربەك. وعان قاتىسۋشىلار ءبىلىم بەرۋ سالاسىنداعى رەفورمالاردى جەتىلدىرۋ, جوو-لارداعى كادر تاپشىلىعى ماسەلەسىن جويۋ, وڭىرلىك عىلىم ورتالىقتارىن دامىتۋ جانە عىلىم اكادەمياسىنىڭ جۇمىسىن جانداندىرۋ جايىن تالقىلادى. ودان بولەك, قازاق ءتىلىن زاماناۋي عىلىم تىلىنە اينالدىرىپ, تەرميندەردى بىرىزدەندىرۋ جونىندە دە بىرقاتار ۇسىنىس ايتىلدى.

ۇلتتىق قۇرىلتايدىڭ بۇگىنگى جيىنىن «الەۋمەتتىك-ەكونوميكالىق دامۋ»  سەكتسياسى قورىتىندىلادى. اتالعان تاقىرىپ تالقىسىنىڭ مودەراتورى پرەمەر-ءمينيستردىڭ ورىنباسارى سەرىك جۇمانعارين بولدى.

Zakon.kz جازعانداي, بۇل تالقىلاۋ الاڭىندا قۇرىلتاي مۇشەلەرى قوسىمشا قۇن سالىعىنا قاتىستى سۇراقتاردى تالقىلادى. سونداي-اق وتاندىق ءوندىرىستى ۇلعايتۋ, ەڭبەك قاۋىپسىزدىگىن كۇشەيتۋ جانە شيكىزات ءوندىرىسىن دامىتۋ جولدارى تۋرالى ۇسىنىستارىن ورتاعا سالدى.

بۇعان دەيىن مادەنيەت جانە اقپارات ءمينيسترى ايدا بالاەۆانىڭ قۇرىلتايدىڭ 100-دەن استام مۇشەسى ءتۇرلى تالقىلاۋلارعا قاتىسىپ, كۇننىڭ ءبىرىنشى جارتىسىندا الەۋمەتتىك-ەكونوميكالىق دامۋدان باستاپ وسكەلەڭ ۇرپاقتى تاربيەلەۋگە دەيىنگى كوپتەگەن ماسەلەلەردى قوزعايتىن 120 ۇسىنىس ەنگىزدى.