ۇلتتىق ۇلان ساربازدارى قۇلسارىعا كومەككە كەلدى.

قۇلسارى قالاسىنداعى جاعداي ءالى كۇردەلى. ۇلتتىق ۇلان ساربازدارى كومەككە كەلدى. اۋداندىق اۋرۋحاناداعى ناۋقاستار ءتۇنى بويى بەينەۋ اۋدانىنا ەۆاكۋاتسيالاندى.

تۇرعىندار تەڭىز كەن ورنىنا ورنالاستىرىلدى. كورشى ماڭعىستاۋ وبلىسىنىڭ تۇرعىندارى دا كومەككە كەلىپ جاتىر.   اسلانبەك شىعىر, ءتىلشى: — ءيا, جىلىوي اۋدانىنداعى احۋال ءالى دە تۇراقتالماي تۇر. قۇلسارى قالاسىندا 2500-دەن اسا تۇرعىن ءۇي, مەملەكەتتىك عيماراتتار سۋ استىندا قالدى. قازىر دە ەۆاكۋاتسيالاۋ جۇمىستارى ءجۇرىپ جاتىر. تاسقىنعا قارسى جۇمىستارعا وبلىس ورتالىعىنان 30 پوليتسيا قىزمەتكەرى, ۇلتتىق ۇلاننىڭ 80 ساربازى كەلدى. كورشىلەس ماڭعىستاۋ وبلىسىنىڭ بەينەۋ اۋدانىنان كومەككە كەلگەن اسكەريلەر دە جاعا بەكىتۋ جۇمىستارىنا جۇمىلدىرىلعان. ءابدىماناپ ەرگەش, 99116 اسكەري بولىمشەنىڭ ارنايى ماقساتتاعى بارلاۋ-شابۋىلداۋ باتالونىنىڭ سەرجانتى: — ارنايى ماقساتتاعى بارلاۋ پولكىنەن 55 اسكەري قىزمەتشى وسىندا, قۇلسارى قالاسىنا سۋ تاسقىنىنا كومەكتەسۋگە كەلدىك.

تىنىمسىز جۇمىس ىستەپ جاتىرمىز, ءۇزىلىس بولعان جوق. ەۆاكۋاتسياعا قاتىستىق. ەڭ ءبىرىنشى, حالىققا كومەكتەسۋ, ەڭ باستىسى. اسلانبەك شىعىر, ءتىلشى: — توتەنشە جاعداي جاريالانىپ, ەۆاكۋاتسيالاۋ جۇمىستارى باستالعالى 12 500-دەن اسا تۇرعىن قاۋىپسىز جەرگە ورنالاسقان. اۋدان اكىمى ورىنباسارى گۇلنافيس ايشۋاقوۆانىڭ سوزىنشە, قازىر قۇلسارى قالاسىنىڭ 50%-كە جۋىعى سۋعا كەتكەن.