ۇلى دالا ۇستازى: قانداستار اراسىندا وتكەن حالىقارالىق بايقاۋ مارەسىنە جەتتى

ۇلتىمىزدىڭ ۇلى تۇلعاسى, اسا كورنەكتى اعارتۋشى ىبىراي ءالتىنساريننىڭ 180 جىلدىعىنا وراي «وتانداستار قورى» وتكىزگەن « ۇلى دالا ۇستازى» حالىقارالىق بايقاۋى مارەگە جەتىپ, جەڭىمپازدار انىقتالدى. سايىس تالابىنا ساي تاقىرىپتىق شىعارمالار مەن ىبىراي التىنسارين ولەڭدەرى جاتقا وقىلعان بەينەروليكتەر قابىلدانىپ, قازىلار القاسىنىڭ ءادىل ىرىكتەۋىنەن وتكىزىلدى. بايقاۋعا الىس-جاقىن 10 مەملەكەت پەن تاريحي وتانى قازاقستانعا ورالعان قانداس وقۋشىلاردان ۇزىنسانى 150-دەن استام ماتەريال ءتۇستى. جۇزدەن جۇيرىك, مىڭنان تۇلپار شىققان 3 ۇمىتكەر ۇزدىك دەپ تانىلدى. I ورىنعا اراي مۇقاراپقىزى (موڭعوليا), II ورىنعا بەكزات جۇمابەكوۆا (وزبەكستان), III ورىنعا ۋميد نۋري (اۋعانستاننان ورالعان قانداس) يە بولدى. جۇلدەگەرلەرگە الداعى 2022 جىلعى جاز ماۋسىمىندا ەل ورداسى – نۇر-سۇلتان قالاسىنداعى نازارباەۆ زياتكەرلىك مەكتەبىنىڭ جازعى دەمالىس لاگەرىنە تەگىن جولداما بەرىلەدى. «سونىمەن قاتار, ۇلتىمىزدىڭ ۇلى تۇلعاسىن ۇلىقتاۋعا بەلسەنە اتسالىسىپ, بايقاۋدا باق سىناسقان بارشا قاتىسۋشىلارعا رياسىز ريزالىق بىلدىرەمىز. وزات وقۋشىلار مەن بالعىن بالالاردى باپتاعان ۇلاعاتتى ۇستازدارعا العىس ايتامىز» دەيدى وتانداستار قورىنان.