« ۇلىنىڭ دەنەسىن وڭتۇستىك كورەيادان الىپ كەتۋگە كومەكتەسپەگەن»: قازاقستاندىق ايەل سوتتا سىرتقى ىستەر مينيسترلىگىن جەڭىپ شىقتى

فوتو: wikipedia.org

قازاقستان رەسپۋبليكاسىنىڭ كورەياداعى ەلشىلىگىنەن كومەك كۇتپەي-اق, ۇلىن ەلگە جەتكىزۋ شىعىنىن ءوز بەتىنشە تولەگەن قازاقستاندىق ايەل سىرتقى ىستەر مينيسترلىگىن سوتقا بەردى. بۇل تۋرالى Stan.kz اقپارات اگەنتتىگى حابارلايدى.

استانانىڭ مامانداندىرىلعان اۋدانارالىق اكىمشىلىك سوتى وڭتۇستىك كورەيادا كوز جۇمعان قازاقستان ازاماتىنىڭ ءمايىتىن جەتكىزۋ شىعىندارىن سىرتقى ىستەر مينيسترلىگىنە جابۋعا مايۋبۇرلەۋ تۋرالى ءىستى قارادى. بۇل تۋرالى استانا اۋدانارالىق مامانداندىرىلعان سوتتىڭ سۋدياسى جانار دۇيسەنوۆا Facebook پاراقشاسىندا حابارلادى.

سۋديانىڭ ايتۋىنشا, قازاقستاندىق ايەل 23 جاستاعى ۇلىنىڭ قاتەرلى ىسىگىن ەمدەتۋگە وڭتۇستىك كورەياعا كەتكەن. الايدا جىگىت سول ەلدە كوز جۇمعان, اناسى ءمايىتتى وتانىنا جەتكىزۋگە قارجىلاي كومەك سۇراپ, قازاقستاننىڭ كورەياداعى ەلشىلىگىنە حابارلاسقان.

الايدا ولاردىڭ اقشا اۋدارعانىن كۇتپەي, ايەل قارىز الىپ, قايىرىمدىلىق كومەك ارقىلى بارلىق شىعىندى ءوزى كوتەرىپتى. سىرتقى ىستەر مينيسترلىگى مۇنى مەملەكەتتىك كومەكتەن باس تارتۋ دەپ باعالاپ, اكىمشىلىك ءراسىمدى توقتاتقان.

سول ءۇشىن ايەل سوتقا جۇگىندى. سەبەبى ول قارىزدارىن مينيسترلىكتىڭ قارجىسىمەن جابامىن دەپ ويلاعان ەكەن.

قازاقستان زاڭناماسىنا سايكەس, ازامات شەتەلدە كوز جۇمعان جاعدايدا كونسۋلدىق ونىڭ جەرلەۋىن قامتاماسىز ەتۋگە نەمەسە ءمايىتتى وتانىنا جەتكىزۋدى ۇيىمداستىرۋعا مىندەتتى (قر كونسۋلدىق جارعىسىنىڭ 84-بابى).

«سوت قازاقستاندىق ديپلوماتتار مارقۇمنىڭ جەرلەۋ نەمەسە ءمايىتىن جىبەرۋ شارالارىن قولدانۋعا مىندەتتى دەپ سانادى. «شەتەلدە قازاقستان رەسپۋبليكاسىنىڭ مۇددەسىن قورعاۋ» باعدارلاماسى ازاماتتارعا باگاجدى جونەلتۋ, 200 جۇكتى راسىمدەۋ, دەنەنى بالزامداۋ جانە ءمايىتحانادا ساقتاۋ شىعىندارىن تولەي وتىرىپ, ازاماتتارعا ماتەريالدىق كومەك كورسەتۋى كەرەك, – دەدى دۇيسەنوۆا.

ايەلدىڭ جەرلەۋ ءراسىمىن ءوزى تولەسە دە, مەملەكەت شەتەلدە قيىن جاعدايعا تاپ بولعان ازاماتتارىنا ماتەريالدىق كومەك كورسەتۋ مىندەتىنەن بوساتىلمايدى.

سوتتا كونسۋل ايەلگە ۇلىنىڭ قازا بولعانى تۋرالى كۋالىك بەرىپ, ماتەريالدىق كومەك كورسەتۋ ءۇشىن قاجەتتى شارالار جاسالماعانى اتاپ ءوتىلدى. سىرتقى ىستەر مينيسترلىگى اكىمشىلىك ءراسىمدى قايتا جۇرگىزىپ, تالاپكەردىڭ پايداسىنا شەشىم قابىلداۋعا مىندەتتى.

سوت شەشىمى زاڭدى كۇشىنە ەندى.