Ulysmedia.kz سايتىنىڭ باس رەداكتورى سامال يبراەۆاعا كيبەرشابۋىل جاسالدى

فوتو: ينستاگرام

Ulysmedia.kz سايتىنىڭ باس رەداكتورى سامال يبراەۆانىڭ جالعان ءپروفيلى Kyzdar.net سايتىندا پايدا بولدى, دەپ حابارلايدى  qandastar.kz Orda.kz-كە سىلتەمە جاساپ.

بەلگىسىز ادامدار Ulysmedia.kz سايتىنىڭ باس رەداكتورى سامال يبراەۆاعا قارسى كيبەرشابۋىل ۇيىمداستىردى. ءجۋرناليستىڭ ايتۋىنشا, ونىڭ سۋرەتى, اتى-ءجونى مەن جەكە تەلەفون ءنومىرى ينتيم قىزمەتىن ۇسىناتىن سايتتاردىڭ بىرىندە جالعان انكەتا ارقىلى جاريالانعان.

«ماعان: «ماقالانى ءوشىر, تاقىرىپتى وزگەرت, سۋرەتتى الىپ تاستا. ايتپەسە كورسەتەمىز» دەگەن ەسكەرتۋلەر بىرنەشە رەت جاسالدى. اقىرى ولار ىسكە كوشتى. Kyzdar.net سايتىندا ماعان تيەسىلى ەمەس, جالعان پروفيل پايدا بولدى. قازىر تەلەفونىمدا تىنىم جوق. انايى ۇسىنىستار, تانىستاردىڭ قوڭىراۋى مەن سۇراقتارى تولاستاماي تۇر. بۇل مەنىڭ كاسىبي قىزمەتىمە جاسالعان تىكەلەي شابۋىل», — دەدى جۋرناليست.

ونىڭ پىكىرىنشە, بۇل شابۋىل Ulysmedia.kz پورتالىنىڭ رەداكتسيالىق ۇستانىمىنا, اتاپ ايتقاندا ەل ىشىندەگى وتكىر ماسەلەلەردى كوتەرۋىنە بايلانىستى جاسالعان بولۋى مۇمكىن.

قۇقىق قورعاۋ ورگاندارىنا جۇگىنگەننەن كەيىن بەس كۇن وتكەن سوڭ عانا كيبەرشابۋىل رەسمي تۇردە تسيفرلىق بۋللينگ جانە كيبەرقىلمىس رەتىندە تانىلىپ, قىلمىستىق ءىس قوزعالعان. جۋرناليست وسىنداي وقيعانى ەكى جىل بۇرىن دا باستان وتكەرگەنىن ەسكە سالىپ, ول كەزدە تەك پرەزيدەنت قاسىم-جومارت توقاەۆتىڭ ارالاسۋىنان كەيىن عانا ءىستىڭ ىلگەرى جىلجىعانىن ايتتى.

«بۇل جولى دا مەملەكەت باسشىسىنىڭ نازار اۋداراتىنىنا سەنەمىن. جۋرناليستەرگە قىسىم كورسەتۋ مەن قاۋىپ ءتوندىرۋ — پرەزيدەنت ۇستانىپ وتىرعان اشىق قوعام مەن ادىلەتتىلىك قاعيداتتارىنا قايشى», — دەپ مالىمدەدى جۋرناليست.

سونداي-اق ول Kyzdar.net سايتىنىڭ قىزمەتىنە دە زاڭدى باعا بەرۋدى سۇراپ وتىر. ونىڭ پىكىرىنشە, سايتتا فەيك-انكەتا جەكە ومىرگە قول سۇعۋ, ار-نامىستى قورلاۋ جانە ىسكەرلىك بەدەلگە نۇقسان كەلتىرۋ ارەكەتتەرى كوپ.

«بۇل — تەك مەنىڭ ەمەس, ەلىمىزدەگى كەز كەلگەن ايەلدىڭ باسىنا ءتۇسۋى مۇمكىن قاۋىپ. سوندىقتان تسيفرلىق زورلىققا قارسى كۇرەس – مەملەكەتتىك دەڭگەيدە قولعا الىنۋى ءتيىس» — دەپ مالىمدەدى جۋرناليست.

قازىرگى تاڭدا پوليتسيا جالعان انكەتا جاساعانداردى انىقتاۋ جانە زاڭسىز كونتەنتتى جويۋ بويىنشا تەرگەۋ جۇرگىزىپ جاتىر. ال Ulysmedia.kz رەداكتسياسى قىسىم مەن بوپساعا قاراماستان, ءوز جۇمىسىن جالعاستىرا بەرەتىنىن حابارلادى.