جاڭالىقتار
ۇلىتاۋ وبلىسىندا قازا بولعان جەتى كەنشىنىڭ وتباسىلارىنا جالاقىلارىنىڭ 10 ەسەلەنگەن مولشەرى بەرىلەدى
فوتو: Istock.com
ۇلىتاۋ وبلىسىنىڭ اكىمدىگى مەن «قازاقمىس كورپوراتسياسى» جشس جومارت كەنىشىندە مەرت بولعان قىزمەتكەرلەردىڭ وتباسىلارىنا كومەكتەسەتىنىن مالىمدەدى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
ۇلىتاۋ وبلىسىنىڭ اكىمدىگى كەن ورنىندا قازا تاپقان جۇمىسشىلاردىڭ وتباسىلارى مەن جاقىندارىنا پسيحولوگيالىق جانە الەۋمەتتىك قولداۋ كورسەتەتىنىن مالىمدەدى. قايعىلى وقيعاعا بايلانىستى ءوڭىر باسشىسى داستان رىسپەكوۆ كوڭىل ايتتى.
«قايعىلى وقيعا بارشامىزدىڭ جۇرەگىمىزگە اۋىر ءتيدى. بۇل جاعداي – بىرنەشە وتباسى ءۇشىن ورنى تولمايتىن قازا. مەرت بولعان كەنشىلەردىڭ تۋعان-تۋىستارىنا, جاقىندارىنا شىن جۇرەكتەن كوڭىل ايتامىن. بۇل قاسىرەت بارشامىز ءۇشىن وڭايعا سوققان جوق. قازا تاپقانداردىڭ وتباسىلارىنا قاجەتتى كومەك كورسەتۋ ءۇشىن بارلىق ءتيىستى شارا قابىلدانادى», – دەلىنگەن كوڭىل ايتۋ جەدەلحاتىندا.
“قازاقمىس” مورالدىق زياندى وتەۋ ءۇشىن, قازا تاپقانداردىڭ وتباسىلارىنا جۇمىسكەردىڭ ورتاشا جىلدىق جالاقىسىنىڭ 10 ەسەلەنگەن مولشەرىن بەرەدى. سونداي-اق جەرلەۋ راسىمدەرىن ۇيىمداستىرۋعا 2 ميلليون تەڭگەدەن استام قارجى تولەنەدى ەكەن.
“اسىراۋشىسىنان ايىرىلۋ جاعدايىنا اي سايىنعى تولەم, بالالاردىڭ وقۋ اقىسىن تولەۋ, قازا تاپقان جۇمىسشىلاردىڭ نەسيە جانە قارىزدارىن جابۋ, سونداي-اق وتباسى مۇشەلەرىنىڭ ءوتىنىشى بويىنشا باسقا دا كومەك تۇرلەرى قاراستىرىلعان”, – دەپ مالىمدەدى كورپوراتسيانىڭ ءباسپاسوز قىزمەتى.
ەسكە سالساق, بۇعان دەيىن ۇلىتاۋ وبلىسىنداعى كەنىشتە جەتى جۇمىسشى ءۇيىندى استىندا قالعانى ايتىلعان ەدى. 18 اقپان تاڭدا جەتى قىزمەتكەردىڭ دەنەسى تابىلدى.
