«ۇماي» ايەلدەر يپوتەكاسى قايتا ىسكە قوسىلماق: باعدارلاماعا قانداي وزگەرىس ەنگىزىلگەن?

فوتو: اشىق دەرەككوز

ايەلدەرگە ارنالعان «ۇماي» يپوتەكالىق باعدارلاماسى كەلەر جىلى قايتا ىسكە قوسىلادى, – دەپ حابارلايدى qandastar.kz

بۇل جاڭالىقتى «وتباسى بانك» اق باسقارما توراعاسىنىڭ ورىنباسارى نۇرلان اقشانوۆ Facebook-تەگى جەكە پاراقشاسىندا جاريالادى. يپوتەكانى الۋ ءۇشىن العاشقى جارنا رەتىندە نەسيەنىڭ 20 پايىزىن «وتباسى» بانكىنىڭ دەپوزيتىندە ساقتاۋ قاجەت. ىرىكتەۋ كەزىندە دەپوزيتتەگى جيناقتالعان سىياقىنىڭ كولەمى ماڭىزدى ءرول اتقارادى. قاتىسۋشىلارعا ەشقانداي كەزەكتە تۇرۋدىڭ قاجەتى جوق. ال پاتەردى كەز كەلگەن قالادان نەمەسە اۋىلدان ساتىپ الۋعا بولادى.

 «بۇرىن 4 قالاعا – استانا, الماتى, اتىراۋ, اقتاۋعا وتىنىمدەر كولەمى بويىنشا شەكتەۋلەر بولعان. ەندى بۇل شەكتەۋلەر دە جويىلدى. ايتپاقشى, ءبىزدىڭ بانكتە بىرگە قارىز الۋشى اتا-انالاردان باستاپ, كۇيەۋى, ەرەسەك بالالارى, قۇربىلارى, دوستارى مەن تۋىستارى بولا الادى. ستيپەنديانى دا كىرىس رەتىندە قارايمىز, قىزىڭىزعا جاڭا قالادا پاتەر العىڭىز كەلسە, ايەلدەر يپوتەكاسىن نەگە پايدالانباسقا?» – دەپ جازدى اقشانوۆ.

باعدارلاماعا كەز كەلگەن وتباسىلىق مارتەبەگە يە ايەلدەر قاتىسا الادى. ءارى بۇل ايەلدىڭ ءبىرىنشى, ەكىنشى نەمەسە ءۇشىنشى پاتەرى بولۋى مۇمكىن. قاتىسۋشىلاردىڭ تابىسى 900 مىڭ تەڭگەدەن اسپاۋى كەرەك. سونىمەن قاتار ايەلدەر وزدەرىنىڭ زەينەتاقى جيناقتارىن پايدالانىپ, جاقىن تۋىستارىنىڭ اقشاسىن دا دەپوزيتكە اۋدارۋعا بولادى.