«Umaı» áıelder ıpotekasy qaıta iske qosylmaq: Baǵdarlamaǵa qandaı ózgeris engizilgen?

Foto: ashyq derekkóz

Áıelderge arnalǵan «Umaı» ıpotekalyq baǵdarlamasy keler jyly qaıta iske qosylady, – dep habarlaıdy qandastar.kz

Bul jańalyqty «Otbasy bank» AQ basqarma tóraǵasynyń orynbasary Nurlan Aqshanov Facebook-tegi jeke paraqshasynda jarııalady. Ipotekany alý úshin alǵashqy jarna retinde nesıeniń 20 paıyzyn «Otbasy» bankiniń depozıtinde saqtaý qajet. Irikteý kezinde depozıttegi jınaqtalǵan syıaqynyń kólemi mańyzdy ról atqarady. Qatysýshylarǵa eshqandaı kezekte turýdyń qajeti joq. Al páterdi kez kelgen qaladan nemese aýyldan satyp alýǵa bolady.

 «Buryn 4 qalaǵa – Astana, Almaty, Atyraý, Aqtaýǵa ótinimder kólemi boıynsha shekteýler bolǵan. Endi bul shekteýler de joıyldy. Aıtpaqshy, bizdiń bankte birge qaryz alýshy ata-analardan bastap, kúıeýi, eresek balalary, qurbylary, dostary men týystary bola alady. Stıpendııany da kiris retinde qaraımyz, qyzyńyzǵa jańa qalada páter alǵyńyz kelse, áıelder ıpotekasyn nege paıdalanbasqa?» – dep jazdy Aqshanov.

Baǵdarlamaǵa kez kelgen otbasylyq mártebege ıe áıelder qatysa alady. Ári bul áıeldiń birinshi, ekinshi nemese úshinshi páteri bolýy múmkin. Qatysýshylardyń tabysy 900 myń teńgeden aspaýy kerek. Sonymen qatar áıelder ózderiniń zeınetaqy jınaqtaryn paıdalanyp, jaqyn týystarynyń aqshasyn da depozıtke aýdarýǵa bolady.