«ۇنەمى بارىپ تۇرامىن»: ايەلدى باسپالداقتان يتەرگەن امانتاي قاجى ءوز شىندىعىن ايتتى

الەۋمەتتىك جەلىدە امانتاي قاجى اسىلبەكوۆتىڭ ءبىر ايەلدى باسپالداقتان يتەرىپ جىبەرگەنى تۇسىرىلگەن ۆيدەو قىزۋ تالقىعا ءتۇستى, دەپ حابارلايدى Qandastar.kz سايتى KursivMedia-عا سىلتەمە جاساپ.

وقيعاعا قاتىستى پىكىر بىلدىرگەن امانتاي قاجىنىڭ ايتۋىنشا, ۆيدەو — شىندىققا جاناسپايدى.

– ءبارى جالعان. ونداي جاعداي بولماعان. مەن ۇنەمى ستاديونعا بارىپ تۇرام. سول كۇنى ماس كۇيدە ءبىر ايەل – بيعايشا دەگەن – الدىمنان شىعىپ, «ووو» دەپ قۇشاقتاي جونەلدى. مەن قاجى اداممىن, ونداي نارسەگە قارسىمىن. قولىن قاعىپ جىبەرگەنىمدە, ول قۇلاپ ءتۇستى. قاسىندا ءبىر جىگىت بولدى, سوعان «كوتەر» دەدىم. بىراق ونىڭ باسقا ويى بولعان سياقتى. جاۋلارىم كوپ قوي, نە ماقساتپەن تۇسىرگەنىن بىلمەيمىن, – دەدى ول.

امانتاي قاجى ەشكىمگە قول كوتەرمەگەنىن, بۇل وقيعا – وزىنە قارسى جاسالعان ارانداتۋ ەكەنىن ايتتى.

– ۇرعان جوقپىن. كەيىن اۋرۋحاناعا دا باردىم. جۋرناليستەر كەلدى. قاراسا, ەشتەڭە بولماعان. ايەل شاي ءىشىپ وتىر, – دەدى ول.

الماتى قالاسى المالى اۋداندىق پوليتسيا باسقارماسى بۇل وقيعا بويىنشا قر قىلمىستىق كودەكسىنىڭ 107-بابى – «دەنساۋلىققا قاساقانا ورتاشا اۋىرلىقتاعى زيان كەلتىرۋ» بابىمەن ءىس قوزعالعانىن حابارلادى.

قازىر سوت-مەديتسينالىق ساراپتاما جۇرگىزىلىپ جاتىر. ناتيجەسىنە قاراي پروتسەسسۋالدىق شەشىم قابىلدانادى.