“ۇرعان بەس وقۋشى مۇعالىمنىڭ بالاسى”: اقتوبەدە توبەلەستەن كەيىن كوز جۇمعان وقۋشىنىڭ تۋىسى كىنالىلەردى جاۋاپقا تارتۋدى سۇرادى

فوتو: اشىق دەرەككوز

اقتوبە وبلىسى قوپا اۋىلىندا وقۋشىلار اراسىنداعى توبەلەستەن كەيىن قازا بولعان 14 جاستاعى نۇرجان سىدىقتىڭ دەنەسى جەر قوينىنا تاپسىرىلدى. بۇل تۋرالى Stan.kz اقپارات اگەنتتىگى حابارلايدى.

مارقۇمنىڭ تۋىستارىنىڭ ايتۋىنشا, 9 سىنىپتا وقيتىن ۇلدارىن 10-11 سىنىپ وقۋشىلارى اۋىلدىڭ شەتىنە شاقىرىپ ۇرعان. اتا-اناسى جەتكەندە بالاسىنىڭ جانسىز دەنەسىن عانا تاپقان.

“توپتاسىپ جاسالعان ارەكەت. سول توپتاعىلاردىڭ ءبارى جاۋاپقا تارتىلسىن. باۋىرىمدى شىعارىپ جاتقاندا ءبىر اتا-انا بالاسىن ەرتىپ, كەشىرىم سۇراپ كەلدى. ول “مەن دە ۇردىم” دەپ كەشىرىم سۇرادى. كىنالى تەك ەكى بالا ەمەس. جوعارى سىنىپتا وقيتىن 5-6 بالا ۇرىپ تۇر. ىشىندە بەسەۋى مۇعالىمنىڭ بالاسى. ناعاشى اعاسى اۋداندىق پوليتسيا بولىمىندە ىستەيتىن بالا بوستاندىقتا ءجۇر. ءوزى كىشكەنتاي اۋىل ءبارى بىلەدى. ول بالا ۇنەمى اۋىل بالالارىنا الىمجەتتىك جاساپ جۇرەدى. ءوزى مۇعالىمنىڭ بالاسى. قاسىندا بولعان بالالاردىڭ ءبارى سونىڭ ۇرعانىن ايتىپ وتىر”, – دەدى مارقۇمنىڭ اپاسى مەرەكە قالدىباەۆا.

مارقۇمنىڭ اپاسىنىڭ سوزىنشە, قايعىلى وقيعا ورىن الار كۇنى كەشكىسىن بالانى سىنىپتاستارى ەرتىپ الىپ كەتكەن.

“ساعات 23:00 شاماسىندا ونىڭ تالىپ قالعاندىعى تۋرالى حابار جەتتى. اۋىلدىڭ شەتىنە اپارىپ بالالار ساباعان. 9 سىنىپ ۇلدارىن 10-11 سىنىپ بالالارى شاقىرىپ ۇرعان. ءبارى ۇرىپ شىققان. بوكسەر بالا ەكى سوققى بەرگەندە قۇلاعان. كۇرە تامىرى ءۇزىلىپ, باسى ءىسىپ كەتكەن. قازىر ەكى بالانى عانا قامادى. ناعاشى اعاسى پوليتسيادا ىستەيتىن بۇل بالا ۇرسا دا كۇدىكتىلەر قاتارىنان قالاي شىعىپ قالادى? بۇل تانىستارى بار وتباسى. بىزگە ادىلدىك كەرەك. بارلىق بالا جازاسىن السىن. ازعانتاي عانا 250 بالاسى بار مەكتەپ ءتارتىپ قايدا, اۋىلدىڭ ۋچاستكەلىك پوليتسيا قىزمەتكەرى ەشقانداي جۇمىس جۇرگىزبەيدى. بۇعان دەيىن دە باۋىرىمدى تاريح ءپانى ساباعىندا مەكتەپ پراكتيكانتى موينىنان قىلقىندىرىپ, جازاسىز قالدى. اتا-اناسىنا بۇل تۋرالى ايتپاعان. تەكسەرسىن ءبارىن”, – دەدى مارقۇمنىڭ اپاسى مەرەكە قالدىباەۆا.

تۋىستارىنىڭ قولىندا كۋاگەرلەردىڭ وقيعانى بايانداعىن اۋديو جازباسى ءجۇر. وندا بالانى بىرنەشە رەت ۇرعانى ايتىلادى.

“نۇرجان قورىلداپ, تالىپ جاتقان. مۇمكىن امان قالار ما ەدى. ءبىرىنشى ۇرعاندا-اق تالدىرىپ تاستاعان. ەسىن جيعاندا قايتىپ ۇرعان. نۇرجاندى ءبارى سۇيرەپ اپارعان. بۇرىن مەكتەپتى ءبىتىرىپ كەتكەن ءازيز دەگەن بالا سول جەرگە ماشينامەن كەلگەندە ءبارى جان-جاققا قاشقان. جەدەل جاردەم شاقىرعان. اۋا جۇتسىن دەپ نۇرجاننىڭ وكپەسىنەن باسقاندا مۇرنىنان قان شىققان”, – دەلىنگەن جازبادا.

تۋىستارى 14 جاستاعى نۇرجان سىدىقتىڭ كوڭىلدى جۇرەتىنىن, قوعامدىق شارالارعا بەلسەندى قاتىسقانىن ايتادى.

اتالعان جاعدايدى باس پروكۋرور جەكە باقىلاۋىنا الاتىنىن حابارلاعان. قازىرگى ۋاقىتتا قوپا اۋىلدىق مەكتەبى ديرەكتورىنىڭ ءوز ەركىمەن جۇمىستان شىققانى بەلگىلى بولدى.

“مەكتەپ ديرەكتورى وقيعا ورىن العانعا دەيىن وتباسى جاعدايىنا بايلانىستى جۇمىستان بوساتۋ جونىندە ارىز جازعان سول سەبەپتەن ءوز ەركىمەن جۇمىستان شىقتى”, – دەدى اقتوبە وبلىسى ءبىلىم باسقارماسىنىڭ باسشىسى جايىق سۇلتان.

ءبىلىم باسقارماسىنىڭ مالىمەتىنشە, مەكتەپ ديرەكتورى بۇل قىزمەتتى 9 جىل اتقارعان.

ەسكە سالا كەتەيىك, بۇعان دەيىن اقتوبە وبلىسىندا وقۋ جىلىنىڭ العاشقى كۇنىندە, ياعني 2 قىركۇيەكتە وقۋشىلار توبەلەسىپ, 14 جاستاعى بالا قايتىس بولعان ەدى. پوليتسيانىڭ مالىمەتىنشە, جاسوسپىرىمدەر اراسىنداعى توبەلەس 2 قىركۇيەك كۇنى تۇندە اقتوبە وبلىسى تەمىر اۋدانى قوپا اۋىلىندا بولعان.

وقيعاعا قاتىستى اۋىل مەكتەبىنىڭ 18 وقۋشىسىنان جاۋاپ الىنىپ, 2 ادام كۇدىكتى رەتىندە قاماۋعا الىنعان.