ۇرى مەن پوليتسيا سىبايلاس پا? – ماقسات تولىقباي

فوتو:ماكسات تولىكباەۆ

ءماجىلىس دەپۋتاتى ماقسات تولىقباي ىشكى ىستەر ءمينيسترى ەرجان سادەنوۆكە مال ۇرلىعىنىڭ الدىن-الۋ بويىنشا كەشەندى شارالاردى قولدانۋعا قاتىستى دەپۋتاتتىق ساۋال جولدادى, دەپ جازدى qandastar.kz

«اۋىلداعى جۇرت وسى ازىن-اۋلاق مالىنىڭ ارقاسىندا كۇن كورىپ, جان باعىپ ءجۇر. بىراق, ەلدەگى بۇقارا باۋكەسپە ۇرىلاردان ابدەن زارە-ءزاپ بولعان.  اقىرى پرەزيدەنتتەن كومەك سۇراۋعا ءماجبۇر بولعان شىعىس قازاقستان وبلىسى, قاتونقاراعاي اۋدانى تۇرعىندارىنىڭ الەۋمەتتىك جەلىگە شىققان ۆيدەوۇندەۋلەرىن كورگەن شىعارسىزدار?! ماعان دا ونداعان ادام حابارلاستى. ىشكى ىستەر مينيسترلىگى مالىمدەمە  جاسار دەپ بەس كۇن كۇتتىك. الايدا ەشقانداي رەاكتسيا جوق. كاتونقاراعايعا قاراستى شىڭعىستايدىڭ شىرقىن وسى ۇرىلار بۇزىپ ءبىتىردى. الاقانداي اۋىل حالقىنا ۇرى-قارىنىڭ قورلىعى ابدەن وتكەن. توزىمدەرى تاۋسىلىپ, سەنىمدەرى سەتىنەگەن ەل ەندى بار ۇمىتتەرىن ەل باسشىلىعىنا ارتىپ, ياعني پرەزيدەنتتەن كومەك سۇراپ وتىر. ويتكەنى قوي قورالاپ, ءىرى-قارا تابىنداپ, جىلقىسى ءۇيىر-ۇيىرىمەن جوعالىپ جاتقان سوڭ قايتسىن?! پوليتسيا دەگەننەن ابدەن كۇدەر ۇزگەن. وسى كۇنگە دەيىن قانشاما مالى قولدى بولىپ, ۇرلانسا دا, پوليتسيا بىردە-ءبىر «تىشقاق لاقتىڭ» سايدان سانىن, قۇمنان ءىزىن تاپپاعان. بۇل نەنى كورسەتەدى?! نە ىزدەۋگە ق ۇلىقسىز نەمەسە ۇرى مەن پوليتسيا اۋىز جالاسىپ, ىمىرالىسىپ, ىنتىماقتا جۇمىس ىستەيدى. اقيقاتى وسى. باسقاشا ايتۋ مۇمكىن ەمەس!», – دەيدى دەپۋتات.

ماقسات تولىقبايدىڭ ايتۋىنشا, اۋرە سارساڭعا تۇسكەن حالىق اۋداندىق, وبلىستىق ىشكى ىستەر ورگاندارىنىڭ تابالدىرىعىن توزدىرىپ, ابدەن قاجىعان.

«سوندا دا پوليتسياعا ءبارى-ءبىر. جانى اشىماستىڭ, باسى اۋىرماس. مال ۇرلىعىنان شىرقى بۇزىلىپ, شىدامدارى تاۋسىلعان جالعىز شىڭعىستاي ەمەس. باۋكەسپەلەر شىڭعىستايعا ىرگەلەس جاتقان ورنەك, جاڭا ۇلگى, اققاينار, جامبىل, ەڭبەك سەكىلدى ەلدى مەكەندەردە دە ەمەن-ەركىن شايقاپ, جۇرتتىڭ دىمىن قالدىرماي, ەرىك-جىگەرلەرىن ابدەن قۇم ەتكەن. اۋىلدان اۋدانعا ارىز ارقالاپ باراتىن اعايىن «پوليتسيادان ەش قايران جوق, جوعالعان مالدى ءىزىن سۋىتپاي ىزدەمەيدى» دەپ ناليدى. قايتالاپ ايتام. ۇرى مەن پوليتسيا ءبىر, سىبايلاس پا? ايتپەسە, قۇداي-اۋ, جىل ون ەكى ايدا ءبىر اۋىلدىڭ عانا ەمەس, ءبۇتىن ءبىر اۋداننان ءبىر جوق تابىلار ەدى عوي… جوق, ابدەن داندايسىعان ۇرىلىر ءتىپتى, ايىلىن جيار ەمەس!», – دەيدى م. تولىقباي.

دەپۋتات قىلمىستىق كودەكس بويىنشا مال ۇرلىعى ورتاشا اۋىر قىلمىس ەكەنىن ايتىپ ءوتتى.

«اسا iرi مولشەردە جاسالعان مال ۇرلاعاندار 7 جىلدان 12 جىلعا دەيiنگi سوتتالادى» دەپ حالىقتى سەندىرگىمىز كەلەدى. ءتىپتى, مال ۇرلىعى ازايىپ كەلەدى دەپ ءبىزدى دە ىشكى ىستەر ورگاندارى سەندىرگىلەرى كەلەدى. ال ءىس جۇزىندە ءبارى كەرىسىنشە.

قۇرمەتتى ىشكى ىستەر ءمينيسترى جانە ونىڭ ەلدەگى بارلىق جەكە قۇرامى! سىزدەردىڭ نازارلارىڭىزعا!  قازاق «مال اشۋى – جان اشۋى» دەيدى. جۇرتتىڭ جان اشۋىن قوزدىرىپ, جاراسىنا تۇز سەبە بەرمەڭىزدەر! اشىنعان حالىق بارىمتاعا قارىمتا قايتارامىز دەسە, ونى مىنا ءبىز تۇگىلى ءسىز جانە ءسىز باسقارىپ وتىرعان مينيسترلىكتىڭ جەكە قۇرامى توقتاتا المايتىنىڭىزدى تاعى دا ەسىڭىزگە سالعىم كەلەدى. حالىقپەن ويناماڭىزدار! ويلانىڭىزدار! قايتا جوعارىدا اتى اتالعان اۋىلداردىڭ ماسەلەسىن ءجىتى قاداعالاپ, شىعىس قازاقستان وبلىسى قاتونقاراعاي اۋدانىندا ارنايى رەيد جۇرگىزىپ, مال ۇرلىعىنىڭ الدىن-الۋ مەن ۇرىلاردى ۇستاۋ بويىنشا كەشەندى شارالاردى قولعا الۋدى سۇرايمىن», – دەيدى دەپۋتات.