USAID قازاقستاندا ازاماتتىق قوعامدى دامىتۋ مەن لگبت-عا قانشا قاراجات بولگەنى بەلگىلى بولدى

فوتو:yahoo.com

اقش-تىڭ USAID اگەنتتىگىنىڭ شىعىندارى كورسەتىلگەن جاڭ ءتىزىم جاريالاندى. بۇل تۋرالى qandastar.kz Stan.kzاقپارات اگەنتتىگىنە سىلتەمە جاساپ حابارلايدى.

Punchbowl News باسىلىمىنىڭ اقپاراتىنا سايكەس, USAID قازاقستاندا ازاماتتىق قوعامدى دامىتۋ ءۇشىن 2 ميلليون دوللاردان استام قاراجات جۇمساۋدى جوسپارلاعان.

اقش-تىڭ مەملەكەتتىك شىعىندارىنىڭ اشىق دەرەكتەر بازاسى usaspending سايتىنىڭ مالىمەتىنشە, 2,3 ميلليون دوللار Eurasia Foundation ۇيىمىنا بولىنگەن.

Eurasia Foundation – 1990-جىلدارى قۇرىلعان حالىقارالىق كوممەرتسيالىق ەمەس ۇيىم. ول ەۋرازيا ەلدەرىندە دەموكراتيالىق دامۋعا, ەكونوميكالىق وسىمگە جانە الەۋمەتتىك رەفورمالارعا ىقپال ەتۋدى ماقسات ەتەدى. ۇيىم ازاماتتىق قوعامدى, شاعىن بيزنەستى, تسيفرلاندىرۋدى, سىبايلاس جەمقورلىقپەن كۇرەستى قولداپ, ءبىلىم بەرۋ مەن تەحنولوگيالىق جوبالاردى گرانتتار, وقىتۋ باعدارلامالارى جانە حالىقارالىق دونورلارمەن سەرىكتەستىك ارقىلى جۇزەگە اسىرادى.

Usaspending سايتىنىڭ دەرەكتەرىنە سايكەس, Eurasia Foundation ۇيىمى USAID-تەن 2,7 ميلليون دوللار العان. بۇل قاراجات ەۋروپا, ەۋرازيا جانە ورتالىق ازيا ەلدەرىنە كومەك باعدارلامالارىنا ارنالعانىمەن, بارلىق قارجى تولىعىمەن قازاقستانعا باعىتتالعان.

باعدارلامالار بويىنشا قارجىلاندىرۋ تولىقتاي USAID-ءتىڭ شەتەلدەگى كومەك باعدارلاماسى ارقىلى جۇزەگە اسىرىلعان, وعان 2,68 ميلليون دوللار بولىنگەن. بارلىق قارجى 100% قازاقستانعا باعىتتالعان.

باعدارلاما 2024 جىلدىڭ قازان ايىنان 2029 جىلدىڭ قىركۇيەك ايىنىڭ سوڭىنا دەيىن جالعاسۋى ءتيىس بولعان.

ەسكە سالايىق, بۇعان دەيىن امەريكالىق USAID اگەنتتىگى قازاقستانداعى قاي ۇيىمداردى قارجىلاندىرعانى بەلگىلى بولدى. قازاقستاندا USAID زاڭ ۇستەمدىگىن نىعايتۋعا, ينۆەستيتسيالىق احۋالدى جاقسارتۋعا جانە ازاماتتىق قوعامدى دامىتۋعا باعىتتالعان جوبالاردى بەلسەندى تۇردە قولدادى. ونىڭ ىشىندە باق جانە ۇكىمەتتىك ەمەس ۇيىمدار, سونىڭ ىشىندە لگبت قۇقىقتارى تەڭدىكپەن اينالىساتىن ۇيىمدار بولدى.

• مەملەكەتتىك كىرىستەر كوميتەتى قازاقستاندا شەتەلدەن قارجىلاندىرىلاتىن تۇلعالاردىڭ ءتىزىلىمىنىڭ بار ەكەنىن ەسكە سالدى. اگەنتتىك امەريكالىق USAID ۇيىمى توڭىرەگىندەگى داۋ جانە ونىڭ قازاقستانعا ىقتيمال ىقپالى تۋرالى تالقىلاۋلارعا بايلانىستى مالىمدەمە جاساعان.