جاڭالىقتار
ءۇش جىلدا 695 مىڭ رەسەيلىك قازاقستاندىق بانكتەردەن كارتا تىركەتكەن
فوتو: كيوسك.رۋ
قازاقستاندا شەتەل ازاماتتارىنا, اسىرەسە رەسەيلىكتەرگە بانك كارتاسىن بەرۋ كۇرت ازايدى. بۇعان قاڭتار ايىندا ەنگىزىلگەن قاتاڭ شەكتەۋلەر سەبەپ. ۇلتتىق بانكتىڭ مالىمەتىنشە, 1 ناۋرىزداعى دەرەك بويىنشا, ەلىمىزدەگى حالىقارالىق تولەم جۇيەلەرىنىڭ كارتالارى 54,1 ميلليون داناعا دەيىن قىسقارعان. بۇل – الدىڭعى ايمەن سالىستىرعاندا بىردەن 4,6 پايىزعا تومەن كورسەتكىش. وسىنداي قارقىندى قۇلدىراۋ سوڭعى رەت 2022 جىلى رەسەي ۋكرايناعا باسىپ كىرىپ, Visa مەن Mastercard رەسەي نارىعىنان كەتكەن كەزدە بايقالعان ەدى, دەپ جازدى qandastar.kz
سول كەزدە رەسەيلىكتەر قازاقستانعا جاپپاي كەلىپ, حالىقارالىق تولەم جۇيەسىنە قوسىلۋ ءۇشىن جەرگىلىكتى بانكتەردەن كارتا اشا باستاعان بولاتىن. دەگەنمەن اتالعان كورسەتكىش قايتا وڭالا باستاۋى ىقتيمال. ويتكەنى رەسەيلىكتەرگە كارتا بەرۋدى ۋاقىتشا دوعارعان كەيبىر بانك ونى قايتا بەرە باستاعان, بىراق جاڭا تالاپ بويىنشا,دەپ حابارلايدى Dalanews.kz.
جاڭا شەكتەۋ
2025 جىلدىڭ قاڭتار ايىنان باستاپ, قازاقستاننىڭ قارجى نارىعىن رەتتەۋ جانە دامىتۋ اگەنتتىگى بەيرەزيدەنتتەرگە قاتىستى بىرقاتار جاڭا ەرەجە ەنگىزدى.
- جاڭا تالاپ بويىنشا, شەتەل ازاماتتارىنا بەرىلەتىن بانك كارتاسىنىڭ جارامدىلىق مەرزىمى 12 ايدان اسپاۋى ءتيىس.
- سونىمەن قاتار شەتەل ازاماتى ءبىر بانكتەن بەس كارتا نەمەسە ءۇش بانكتەن ءۇش كارتادان ارتىق الا الماۋى كەرەك. ەگەر بۇدان كوپ كارتانى راسىمدەگىسى كەلسە, قوسىمشا تەكسەرۋدەن ءوتۋى كەرەك.
- بۇدان بولەك, بانكتەرگە اقشانى جىلىستاتۋ مەن تەرروريزمدى قارجىلاندىرۋعا بايلانىستى كۇماندى وپەراتسيالاردى انىقتايتىن اۆتوماتتى جۇيەلەردى ەنگىزۋ مىندەتتەلدى.
- وسى شەكتەۋلەرمەن قاتار, قازاقستان ەلشىلىكتەرى مەن كونسۋلدىقتارى شەتەل ازاماتتارىنا جەكە سايكەستەندىرۋ ءنومىرىن (جسن) بەرۋدى دە توقتاتتى. بۇرىن شەتەلدىكتەر جسن-ءدى ديپلوماتيالىق وكىلدىكتەر ارقىلى راسىمدەپ كەلگەن بولسا, ەندى ونى تەك قازاقستان اۋماعىنا كەلىپ, جەرگىلىكتى حالىققا قىزمەت كورسەتۋ ورتالىقتارىنان الۋى كەرەك.
Mitra Law Office زاڭگەرلىك كومپانياسىنىڭ باسشىسى يۋري ميرزوەۆتىڭ ايتۋىنشا, الداعى ۋاقىتتا قازاقستاندىق بانكتەر وسى جاڭا ەرەجەلەرگە قايشى بەرىلگەن كارتالاردى جاپپاي جابۋعا كىرىسەدى. ساراپشىنىڭ ايتۋىنشا, ەرەجەلەردىڭ قاتايتىلۋى قازاقستاننىڭ بانك كارتالارىن رەسەيلىكتەر ءۇشىن تارتىمسىز ەتەدى. ەندى رەسەيلىكتەر قارجى قىزمەتتەرىن الۋ ءۇشىن تاجىكستان, قىرعىزستان, وزبەكستان سەكىلدى كورشى مەملەكەتتەرگە بەت بۇرۋى ىقتيمال. سەبەبى اتالعان ەلدەردە, ازىرگە مۇنداي قاتاڭ تالاپتار جوق.
قازاقستاندىق بانكتەر مەن قازپوشتا Visa, Mastercard, UnionPay جانە American Express كارتالارىن بەرۋدى ءالى دە جالعاستىرىپ وتىر. ۋكرايناداعى سوعىس باستالعاننان بەرى قازاقستان «كارتا ءتۋريزمى» دەپ اتالاتىن قۇبىلىستىڭ نەگىزگى ورتالىقتارىنىڭ بىرىنە اينالدى. بۇل – سانكتسيالاردى اينالىپ ءوتىپ, حالىقارالىق تولەم جۇيەلەرىنە قول جەتكىزۋ ءۇشىن وزگە ەلدەرگە ساپارلاۋ.
Anderida Financial Group ەسەبىنشە, 2024 جىلدىڭ اياعىنا قاراي شەتەلگە شىعاتىن رەسەيلىك ازاماتتاردىڭ شامامەن 15 پايىزى شەتەلدە الىنعان Visa جانە Mastercard كارتالارىن قولدانادى. ولاردىڭ ىشىندە قازاقستاندىق بانكتەردەن كارتا راسىمدەگەن رەسەيلىكتەردىڭ ۇلەسى 36 پايىزدى قۇرايدى. ودان كەيىن تۇركيا (16%), گرۋزيا (10%), قىرعىزستان, وزبەكستان مەن تاجىكستان (12%) جانە ارمەنيا (6%) تۇر.
ەۋرازيالىق ەكونوميكالىق وداق/سانكتسيا تاۋەكەلدەرى
قازاقستاننىڭ ەڭ ءىرى بانكتەرى وسىعان دەيىن-اق رەسەيلىك ازاماتتارعا كارتا بەرۋدى توقتاتقان بولاتىن. ساراپشىلار بۇل وزگەرىستەر قازاقستاندى سانكتسيالىق تاۋەكەلدەردەن قورعاۋ جانە حالىقارالىق قارجى ستاندارتتارىنا ساي بولۋ ءۇشىن جاسالىپ وتىرعان ماڭىزدى قادام دەپ ەسەپتەيدى.
ءبىرشاما ۇزىلىستەن سوڭ, بۇعان دەيىن رەسەيلىكتەرگە كارتا بەرۋدى 19 قاڭتاردان باستاپ دوعارعان ءۇش بانك قازىر ونى قايتا بەرە باستاعان.
ماسەلەن, Halyk Bank, Kaspi Bank جانە «بانك بتۆ»-نىڭ قازاقستانداعى ەنشىلەسىندە بۇل شەكتەۋ 19 قاڭتار مەن 14 اقپان ارالىعىن قامتىدى.
«Kaspi Gold ەۋرازيالىق ەكونوميكالىق وداققا مۇشە ەلدەردىڭ, سونداي-اق قازاقستاندا تۇرۋعا ىقتيارحاتى بار شەتەلدىك ازاماتتار ەش كەدەرگىسىز الا الادى», — دەلىنگەن بانك حابارلاماسىندا.
سونداي-اق ۆتب دا (قازاقستان) رەزيدەنت ەمەستەرگە «مير» كارتاسىن بەرۋدى جاڭعارتتى.
Home Credit Bank ولارعا ءسال كەشىگىپ قوسىلدى: 2025 جىلدىڭ 3 ناۋرىزىنان باستاپ.
جالپى, تسيفرلىق دامۋ مينيسترلىگىنىڭ مالىمەتىنشە, 2022-2024 جىلدارى 695 مىڭ رەسەيلىك قازاقستاندىق بانكتەردەن كارتا تىركەتكەن.
