جاڭالىقتار
ۇشاقتا بومبا بار دەپ ازىلدەگەن جىگىتتىڭ ۇستىنەن قىلمىستىق ءىس قوزعالدى
فوتو: Pixabay
الماتى – ورال باعىتىندا ۇشاتىن ۇشاقتا جاس جىگىت بومبا قويىلعانى تۋرالى جالعان اقپارات تاراتقان. ول ۆيدەونى جەلىگە جۇكتەپ, ازىلدەسكىسى كەلىپتى, دەپ حابارلايدى Skifnews.kz اقپارات پورتالى.
اتالعان جاعدايعا بايلانىستى بورتتى اۋە كۇزەتىنىڭ وكىلدەرى كينولوگتارمەن بىرگە كەلىپ تەكسەرگەن.
سودان كەيىن جاس جىگىتتى ۇشاق بورتىنان ءتۇسىرىپ, الىپ قالعان.
بەينەجازبادا ونىڭ كوزىنە جاس الىپ, قاپالانعانى انىق كورىنەدى.
ءىىم كولىكتەگى پوليتسيا دەپارتامەنتىنىڭ ءباسپاسوز قىزمەتىنەن تۇسكەن مالىمەتكە قاراعاندا, اتالمىش وقيعاعا بايلانىستى تەرروريزم اكتىسى تۋرالى كورىنەۋ جالعان حابارلاۋ بويىنشا قر قك 273-بابىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر.
«وزگە اقپارات قر قىلمىستىق-پروتسەستىك كودەكسiنىڭ 201-بابىنىڭ تالاپتارىنا سايكەس جاريا ەتۋگە جاتپايدى», دەپ حابارلادى ۆەدومستۆودان.
اتالعان باپ بويىنشا ايىپتى دەپ تانىلعان ادام بەس مىڭ ايلىق ەسەپتىك كورسەتكىش مولشەرىندە ايىپپۇل سالۋعا نە سول مولشەردە تۇزەۋ جۇمىستارىنا نە بەس جىلعا دەيىنگى مەرزىمدە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.
