ۇزاق ۇيىقتايتىندار ۇناتپايدى – ۆيتسە-پرەمەر رومان سكليار بىرىڭعاي ۋاقىت بەلدەۋىنە قاتىستى

فوتو: اشىق دەرەككوز

پرەمەر-ءمينيستردىڭ ءبىرىنشى ورىنباسارى رومان سكليار ەلىمىزدەگى بىرىڭعاي ساعات بەلدەۋىن ەنگىزۋگە وراي قازاقستاندىقتاردىڭ شاعىمىنا قاتىستى پىكىر ءبىلدىردى. بۇل تۋرالى Stan.kz اقپارات اگەنتتىگى حابارلايدى.

ۇكىمەت وتىرىسىندا جۋرناليستەر قازاقستاننىڭ بۇرىنعى ۋاقىت بەلدەۋىنە قايتۋى قانشالىقتى مۇمكىن ەكەنىن سۇراپ, حالىقتىڭ باسىم بولىگى بۇرىنعى ۋاقىتتى اڭسايتىنىن ايتتى.

“بۇل – ارينە, ماڭىزدى سۇراق. قوعامنىڭ باسقا ءبىر بولىگى, كەرىسىنشە, جاڭا ۋاقىت بەلدەۋىن قۇپتايدى. مىسالى تاشكەنت پەن شىمكەنت جاقىن ورنالاسقان, سوعان قاراماستان ول جەردە ءبىر ساعاتتىق ايىرماشىلىق بولدى, ال قازىر ۋاقىت ايىرماسى جوق. ولار دا ءبىز سياقتى ۋاقىت بەلدەۋىندە ءومىر ءسۇردى, ەشكىم رەنجىگەن جوق. بۇل كەيبىرەۋلەر ءۇشىن قولايلى, ال باسقاسىنا قولايلى ەمەس.

ال جەكە وزىمە كەلسەك, مەن وتە ەرتە تۇرىپ ۇيرەنگەنمىن, سول ءۇشىن ماعان ۇنايدى. مەنىڭ كەيبىر دوستارىم ۇزاق ۇيىقتايتىندىقتان, ۇناتپايدى, باسقالارى, كەرىسىنشە, ۇناتادى. ياعني, بۇل جەردە ءالى دە بارلىق وڭ جانە تەرىس جاعىن تارازىلاۋ كەرەك», – دەدى رومان سكليار.

ول بىرىڭعاي ۋاقىت بەلدەۋىنىڭ اسەرىن ءالى دە باقىلاۋ قاجەت دەپ سانايدى.

ەسكە سالساق, بۇعان دەيىن دەپۋتاتتار ۋاقىت بەلدەۋى ماسەلەسى ءماجىلىس وتىرىسىندا قارالاتىنىن ايتتى.

1 ناۋرىزدا قازاقستاننىڭ بارلىق ايماعى ءبىر ۋاقىت بەلدەۋىنە اۋىستى. الايدا بىرىڭعاي ۋاقىت بەلدەۋىنە كوشكەننەن كەيىن قازاقستاندىقتار جارىققا كوپ شىعىندالاتىن بولدى. ناۋرىزدا ەل تۇرعىندارى اقپان ايىمەن سالىستىرعاندا ەلەكتر ەنەرگياسىن 364 ملن كۆت/ساعات ارتىق پايدالانعان.

بۇعان دەيىن بىرىڭعاي ۋاقىت بەلدەۋىنە قارسى پەتيتسيا 50 مىڭ قول جيناعانى تۋرالى جازعان ەدىك. ال مينيسترلىك بىرىڭعاي ۋاقىت بەلدەۋىنە قارسى پەتيتسيانى قاناعاتتاندىرماي قويدى.