ۇزاق ۇستاعاننان پايدا جوق: مۇحتار ەربايان ءۇش كۇننەن كەيىن گەرمانياعا اتتانادى

التى ايدان استام ۋاقىت كومادا جاتقان ۇلتتىق ۇلان ساربازى مۇحتار ەربايان ءۇش كۇننەن كەيىن گەرمانياداعى كلينيكالاردىڭ بىرىنە ەم الۋعا اتتانادى, دەپ حابارلايدى qandastar.kz Massaget.kz سىلتەمە جاساپ.

بۇگىن ەرباياندى اتا-اناسى استاناداعى ۇلتتىق نەيروحيرۋرگيا ورتالىعىنا تەكسەرۋگە اكەلدى. ساربازدى ەلىمىزدەگى ەڭ بىلىكتى نەيروحيرۋرگ سەرىك اقشولاقوۆ قابىلداپ الدى.

«بۇكىل اناليزدەرىن الىپ, تەكسەرۋدەن وتكىزگەننەن كەيىن گەرمانياداعى ارىپتەستەرىمىزبەن بايلانىسقا شىعامىز. ول جاقپەن بارلىق ماسەلە شەشىلگەن, تەزدەتىپ جىبەرۋىمىز كەرەك. ەرباياندى ۇزاق ۋاقىتقا ەمدەۋ قاجەت. ءبىز مىنا جاقتا ءبىر ءدارى قولدانساق, گەرمانيادا باسقا ءدارى قولدانۋلارى مۇمكىن. بالانىڭ اناليزدەرى, جاعدايى جاقسى بولىپ, ۇشاقتا ۇشۋدى كوتەرە الاتىن بولسا, تەزدەتىپ جىبەرەمىز. ۇشاقتا ۇشۋعا جاعدايى جەتەتىن سياقتى, سوزا بەرگەننەن ەشقانداي پايدا جوق. اكەسىنەن بىزگە تەك ءۇش كۇن بەرۋدى سۇرادىم», – دەپ پىكىر ءبىلدىردى سەرىك اقشولاقوۆ.

ەرباياننىڭ قاۋىپسىزدىگى ءۇشىن قاسىنا اكەسى بىرگە جاتادى. اسكەري گوسپيتالدا ەربايانعا رۇقساتسىز وتا جاسالعاننان كەيىن, وتباسى دارىگەرلەرگە كۇمانمەن قارايتىندارىن جەتكىزدى.

«اكەسى ەرباياننىڭ قاسىنا بىرگە جاتادى. الماتىدا اسكەري گوسپيتالعا اپارىپ, باسىنىڭ جارتىسىن الىپ تاستادى ەمەس پە?! وسىدان كەيىن ءبىز ەشكىمگە سەنبەيمىز. دەنساۋلىق ءمينيسترى اقمارال ءالنازاروۆا «ءوز قاراۋىما الامىن» دەگەننەن كەيىن عانا وسى ورتالىققا اكەلىپ وتىرمىز. ونىڭ ۇستىنە وتاندىق دارىگەرلەردىڭ انىقتاماسىنسىز گەرمانيا ەرباياندى قابىلدامايدى ەكەن. كەشە رەسەيلىك دارىگەرلەرمەن دە كەڭەستىك, ولار ەرباياننىڭ دەنساۋلىعى جاقسى ەكەنىن, ۇشاققا جارايتىنىن ايتتى. ەندى ءبىر اللاعا, سوسىن دارىگەرلەرگە تاپسىرىپ, جانىمىزدى شۇبەرەككە ءتۇيىپ وتىرمىز», – دەپ كوزىنە جاس الدى ەرباياننىڭ ناعاشى اجەسى كۇلاش يماشقىزى.

دارىگەرلەر ەربايانعا ەم كەزىندە قولدانىلاتىن ءدارى-دارمەكتەر تولىقتاي اكەسىنىڭ رۇقساتىمەن بەرىلەدى دەپ كەپىلدىك بەردى. ازىرگە, دەنساۋلىعىنا قاتىستى قانداي دا ءبىر پىكىر بەرۋگە ەرتە دەيدى.

«ەرباياندى ورتالىققا اكەلگەندەرى جاڭا عانا. ءبىز اناليزدەرىن قاراپ, تەكسەرۋ جۇرگىزىپ جاتىرمىز. ءۇش كۇننەن كەيىن تولىق اقپارات بەرە الامىز. بۇل ءبىزدىڭ تاجىريبەمىزدەگى شەتەلگە اتتاناتىن العاشقى ناۋقاس. ەرباياننىڭ ازىرشە جاعدايى بىرقالىپتى», – دەدى ورتالىق مامانى اسىلبەك قاليەۆ.

ەسكە سالساق, 17 قىركۇيەك كۇنى ەرباياننىڭ اتا-اناسى دەنساۋلىق ساقتاۋ ءمينيسترى اقمارال ءالنازاروۆانىڭ قابىلداۋىندا بولدى. ساربازدىڭ ادۆوكاتى ينگا يمانباي باق وكىلدەرىمەن كەزدەسۋ كەزىندە ەرباياننىڭ جاراقاتىن اسكەردەگى الىمجەتتىككە بايلانىستى دەپ مالىمدەدى.