Uzaq ustaǵannan paıda joq: Muhtar Erbaıan úsh kúnnen keıin Germanııaǵa attanady

Alty aıdan astam ýaqyt komada jatqan ulttyq ulan sarbazy Muhtar Erbaıan úsh kúnnen keıin Germanııadaǵy klınıkalardyń birine em alýǵa attanady, dep habarlaıdy qandastar.kz Massaget.kz silteme jasap.

Búgin Erbaıandy ata-anasy Astanadaǵy Ulttyq neırohırýrgııa ortalyǵyna tekserýge ákeldi. Sarbazdy elimizdegi eń bilikti neırohırýrg Serik Aqsholaqov qabyldap aldy.

«Búkil analızderin alyp, tekserýden ótkizgennen keıin Germanııadaǵy áriptesterimizben baılanysqa shyǵamyz. Ol jaqpen barlyq másele sheshilgen, tezdetip jiberýimiz kerek. Erbaıandy uzaq ýaqytqa emdeý qajet. Biz myna jaqta bir dári qoldansaq, Germanııada basqa dári qoldanýlary múmkin. Balanyń analızderi, jaǵdaıy jaqsy bolyp, ushaqta ushýdy kótere alatyn bolsa, tezdetip jiberemiz. Ushaqta ushýǵa jaǵdaıy jetetin sııaqty, soza bergennen eshqandaı paıda joq. Ákesinen bizge tek úsh kún berýdi suradym», – dep pikir bildirdi Serik Aqsholaqov.

Erbaıannyń qaýipsizdigi úshin qasyna ákesi birge jatady. Áskerı gospıtalda Erbaıanǵa ruqsatsyz ota jasalǵannan keıin, otbasy dárigerlerge kúmánmen qaraıtyndaryn jetkizdi.

«Ákesi Erbaıannyń qasyna birge jatady. Almatyda áskerı gospıtalǵa aparyp, basynyń jartysyn alyp tastady emes pe?! Osydan keıin biz eshkimge senbeımiz. Densaýlyq mınıstri Aqmaral Álnazarova «óz qaraýyma alamyn» degennen keıin ǵana osy ortalyqqa ákelip otyrmyz. Onyń ústine otandyq dárigerlerdiń anyqtamasynsyz Germanııa Erbaıandy qabyldamaıdy eken. Keshe reseılik dárigerlermen de keńestik, olar Erbaıannyń densaýlyǵy jaqsy ekenin, ushaqqa jaraıtynyn aıtty. Endi bir Allaǵa, sosyn dárigerlerge tapsyryp, janymyzdy shúberekke túıip otyrmyz», – dep kózine jas aldy Erbaıannyń naǵashy ájesi Kúlásh Imashqyzy.

Dárigerler Erbaıanǵa em kezinde qoldanylatyn dári-dármekter tolyqtaı ákesiniń ruqsatymen beriledi dep kepildik berdi. Ázirge, densaýlyǵyna qatysty qandaı da bir pikir berýge erte deıdi.

«Erbaıandy ortalyqqa ákelgenderi jańa ǵana. Biz analızderin qarap, tekserý júrgizip jatyrmyz. Úsh kúnnen keıin tolyq aqparat bere alamyz. Bul bizdiń tájirıbemizdegi shetelge attanatyn alǵashqy naýqas. Erbaıannyń ázirshe jaǵdaıy birqalypty», – dedi ortalyq mamany Asylbek Qalıev.

Eske salsaq, 17 qyrkúıek kúni Erbaıannyń ata-anasy Densaýlyq saqtaý mınıstri Aqmaral Álnazarovanyń qabyldaýynda boldy. Sarbazdyń advokaty Inga Imanbaı BAQ ókilderimen kezdesý kezinde Erbaıannyń jaraqatyn áskerdegi álimjettikke baılanysty dep málimdedi.