جاڭالىقتار
V دۇنيەجۇزىلىك كوشپەندىلەر ويىندارىنىڭ جەڭىمپازدارى مەن جۇلدەگەرلەرىنە مەملەكەتتىك ناگرادالار تابىس ەتىلدى
فوتو: سپورت جانە تۋريزم مينيسترلىگى
قر تۋريزم جانە سپورت ءمينيسترى ەربول مىرزابوسىنوۆ ەلورداداعى بەيبىتشىلىك جانە كەلىسىم سارايىندا V دۇنيەجۇزىلىك كوشپەندىلەر ويىندارىنىڭ جەڭىمپازدارى مەن جۇلدەگەرلەرىن, جاتتىقتىرۋشىلاردى مەملەكەت باسشىسى قاسىم-جومارت توقاەۆتىڭ اتىنان قۇرمەت گراموتاسى, قر پرەزيدەنتىنىڭ العىسى, قر پرەزيدەنتىنىڭ العىس حاتى جانە ەرەن ەڭبەگى ءۇشىن مەدالىمەن ماراپاتتادى. بۇل تۋرالى qandastar.kz سپورت جانە تۋريزم مينيسترلىگىنە سىلتەمە جاساپ حابارلايدى.
ءىس-شارا بارىسىندا ەربول مىرزابوسىنوۆ جيىنعا قاتىسۋشىلاردى بايراقتى باسەكەنىڭ ءساتتى اياقتالۋىمەن قۇتتىقتاپ, كوشپەندىلەر دوداسى جوعارى دەڭگەيدە ۇيىمداستىرىلعانىن اتاپ ءوتتى.
«مەملەكەت باسشىسى قاسىم-جومارت توقاەۆ ۇلتتىق سپورتتى دامىتۋعا اركەز قولداۋ كورسەتىپ, ونىڭ ماڭىزدىلىعىن ۇنەمى ايرىقشا اتاپ وتەدى. كوشپەندىلەر ويىندارىنىڭ اشىلۋ سالتاناتىندا « ۇلى دالا ءدۇبىرى» – ەلىمىز ءۇشىن تاريحي وقيعا, ۇلتتىق سپورت تۇرلەرىنەن وتەتىن الەمدەگى ەڭ ءىرى دودا, كوشپەندىلەر وليمپياداسى» دەپ باعالادى. V دۇنيەجۇزىلىك كوشپەندىلەر ويىندارى ارقىلى كوشپەلى مادەنيەتتىڭ بەسىگى قازاق جەرىنەن باستالاتىنىن تاعى ءبىر مارتە تورتكۇل دۇنيەگە پاش ەتتىك. اتا-بابامىزدان مۇرا بولىپ قالعان ءتول ونەرىمىزدى دارىپتەپ, دامىتۋدىڭ جارقىن ۇلگىسىن كورسەتتىك. وسى ورايدا ءىس-شارانىڭ وتۋىنە اتسالىسقان بارلىق سپورتشىلار مەن جاتتىقتىرۋشىلاردىڭ قاجىرلى ەڭبەگىن جوعارى باعالاپ, العىسىمدى ايتامىن. وزدەرىڭىزدەي ۇلتىن سۇيەتىن ناعىز وتانشىل ازاماتتار باردا ەلىمىزدىڭ بولاشاعى جارقىن بولارىنا كامىل سەنەمىن», – دەدى تۋريزم جانە سپورت ءمينيسترى.
8-13 قىركۇيەك كۇندەرى ەلوردادا ۇيىمداستىرىلعان V دۇنيەجۇزىلىك كوشپەندىلەر ويىندارىنا الەمنىڭ 90-عا جۋىق مەملەكەتىنەن 2500-گە تارتا سپورتشى قاتىسىپ, 97 مەدال جيىنتىعىن ساراپقا سالدى.
ايتۋلى الاماندا قازاقستان ۇلتتىق قۇراماسىنىڭ سپورتشىلارى 43 التىن, 32 كۇمىس, 37 قولا (جالپى 112 مەدال) جۇلدە ولجالاپ, جالپىكوماندالىق ەسەپتە ءبىرىنشى ورىنعا يە بولدى. ويىنداردا جالپى سانى 33 ەلدىڭ سپورتشىسى جۇلدەگەرلەر قاتارىنان كورىندى.
