V Dúnıejúzilik kóshpendiler oıyndarynyń jeńimpazdary men júldegerlerine memlekettik nagradalar tabys etildi

Foto: Sport jáne týrızm mınıstrligi

QR Týrızm jáne sport mınıstri Erbol Myrzabosynov elordadaǵy Beıbitshilik jáne kelisim saraıynda V Dúnıejúzilik kóshpendiler oıyndarynyń jeńimpazdary men júldegerlerin, jattyqtyrýshylardy Memleket basshysy Qasym-Jomart Toqaevtyń atynan Qurmet gramotasy, QR Prezıdentiniń Alǵysy, QR Prezıdentiniń Alǵys haty jáne Eren eńbegi úshin medalimen marapattady. Bul týraly qandastar.kz Sport jáne týrızm mınıstrligine silteme jasap habarlaıdy.

Is-shara barysynda Erbol Myrzabosynov jıynǵa qatysýshylardy baıraqty básekeniń sátti aıaqtalýymen quttyqtap, kóshpendiler dodasy joǵary deńgeıde uıymdastyrylǵanyn atap ótti.

«Memleket basshysy Qasym-Jomart Toqaev ulttyq sportty damytýǵa árkez qoldaý kórsetip, onyń mańyzdylyǵyn únemi aıryqsha atap ótedi. Kóshpendiler oıyndarynyń ashylý saltanatynda «Uly dala dúbiri» – elimiz úshin tarıhı oqıǵa, ulttyq sport túrlerinen ótetin álemdegi eń iri doda, Kóshpendiler olımpıadasy» dep baǵalady. V Dúnıejúzilik kóshpendiler oıyndary arqyly kóshpeli mádenıettiń besigi qazaq jerinen bastalatynyn taǵy bir márte tórtkúl dúnıege pash ettik. Ata-babamyzdan mura bolyp qalǵan tól ónerimizdi dáriptep, damytýdyń jarqyn úlgisin kórsettik. Osy oraıda is-sharanyń ótýine atsalysqan barlyq sportshylar men jattyqtyrýshylardyń qajyrly eńbegin joǵary baǵalap, alǵysymdy aıtamyn. О́zderińizdeı ultyn súıetin naǵyz otanshyl azamattar barda elimizdiń bolashaǵy jarqyn bolaryna kámil senemin», – dedi Týrızm jáne sport mınıstri.

8-13 qyrkúıek kúnderi elordada uıymdastyrylǵan V Dúnıejúzilik kóshpendiler oıyndaryna álemniń 90-ǵa jýyq memleketinen 2500-ge tarta sportshy qatysyp, 97 medal jıyntyǵyn sarapqa saldy.

Aıtýly alamanda Qazaqstan ulttyq quramasynyń sportshylary 43 altyn, 32 kúmis, 37 qola (jalpy 112 medal) júlde oljalap, jalpykomandalyq esepte birinshi orynǵa ıe boldy. Oıyndarda jalpy sany 33 eldiń sportshysy júldegerler qatarynan kórindi.