جاڭالىقتار
ۆاكانسيا جوق: قۋاندىق بيشىمباەۆقا تۇرمەدەن جۇمىس تابىلماعان
فوتو: جوعارعى سوت
ازاماتتىق نەكەدەگى ايەلىن ولتىرگەن بۇرىنعى ۇلتتىق ەكونوميكا ءمينيسترى قۋاندىق بيشىمباەۆ كولونيادا جۇمىس ىستەمەيدى. بۇل تۋرالى ءىىم قىلمىستىق-اتقارۋ جۇيەسى كوميتەتى مالىمدەدى, دەپ حابارلايدى Azattyq Rýhy.
ەكس-مينيستر قازىر قاۋىپسىزدىگى جوعارى مەكەمەدە جازاسىن وتەپ جاتىر.
«بوس جۇمىس ورىندارىنىڭ بولماۋىنا بايلانىستى جۇمىسقا تۇرعان جوق. سوتتالۋشىنىڭ كۇن ءتارتىبى قاج مەكەمەسىنىڭ ىشكى ءتارتىپ ەرەجەلەرى جانە قولدانىستاعى قىلمىستىق-اتقارۋ زاڭناماسىنىڭ تالاپتارىنا سايكەس ساقتالادى», – دەلىنگەن حابارلامادا.
بۇعان دەيىن قۋاندىق بيشىمباەۆ كولونيادا اعاش جانە مەتالل وڭدەۋ جۇمىستارىمەن اينالىسا الاتىنى حابارلانعان.
ەستەرىڭىزگە سالايىق, بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ازاماتتىق نەكەدەگى ايەلى سالتانات نۇكەنوۆانى ولتىرگەنى ءۇشىن 24 جىلعا سوتتالدى. قىلمىس 2023 جىلى 9 قاراشادا ەلوردانىڭ سول جاعالاۋىنداعى مەيرامحانادا جاسالعان بولاتىن.
ال بيشىمباەۆتىڭ تۋىسى باقىتجان بايجانوۆ قىلمىستى جاسىرعانى ءۇشىن 4 جىلعا باس بوستاندىعىنان ايىرىلدى.
