ۆەلوسيپەدكە مىنگەسكەن زەينەتكەر قورشاۋعا سوعىپ كوز جۇمدى

پاۆلوداردىڭ ورتالىق جاعالاۋىندا قايعىلى جاعداي بولدى. ءتورت دوڭگەلەكتى ۆەلوسيپەدكە اناسىن جانە ءۇش بالاسىن مىنگىزىپ العان ايەل ادام تومەنگە ءتۇسۋ كەزىندە تەمىر قورشاۋعا سوعىلعان, دەپ حابارلايدى Qandastar.kz پوليتسيا دەپارتامەنتىنە سىلتەمە جاساپ. 

«وقيعا 7 شىلدەگە قاراعان ءتۇنى ورتالىق جاعالاۋدا بولعان. جاعاجايداعى جولدار ارقىلى تومەنگە ءتۇسۋ كەزىندە ايەل رۋلگە يە بولا الماي, مەتالل قورشاۋعا سوقتىعىسقان. وقيعا سالدارىنان زەينەتكەر ايەل العان جاراقاتتارىنان قايتىس بولدى. ونىڭ قىزى مەن نەمەرەلەرى اۋرۋحاناعا جەتكىزىلدى», — دەپ حابارلادى پاۆلودار وبلىسى پوليتسيا دەپارتامەنتىنىڭ ءباسپاسوز قىزمەتىنەن.

اتالعان اۋماق تۇنگى ۋاقىتتا قاراڭعى بولعانى ايتىلادى. ول جەردە ۆەلوسيپەد جۇرۋىنە رۇقسات بەرىلگەن, تىيىم سالۋ بەلگىلەرى جوق. ال ۆەلوسيپەدتىڭ ءوزى جالعا الىنعان ەكەن. قازىر پوليتسيا كىسى ولىمىنە سوقتىرعان جازاتايىم وقيعا بويىنشا تەكسەرۋ جۇمىستارىن جۇرگىزىپ جاتىر.

وڭىرلىك جەدەل جاردەم ستانساسىنىڭ ءباسپاسوز قىزمەتى وقيعا بويىنشا 6 شىلدە ساعات 23.08-دە شاقىرتۋ تۇسكەنىن مالىمدەدى.

«جەدەل جاردەم بريگاداسى وقيعا ورنىنا 6 مينۋتتا جەتتى. وكىنىشكە قاراي, ءبىزدىڭ قىزمەتكەرلەر 69 جاستاعى ايەلدىڭ سول جەردە كوز جۇمعانىن انىقتادى. زارداپ شەككەن 2010, 2015, 2018 جىلعى قىز بالالار وبلىستىق بالالار اۋرۋحاناسىنا, سونداي-اق 39 جاسار ايەل ادام پاۆلودار قالالىق №1 اۋرۋحاناسىنا جەتكىزىلدى», — دەپ حابارلادى جەدەل جاردەم ستانساسىنان.