الەم جاڭالىقتارى
ۆەنەتسيا تولىقتاي سۋ استىنا كەتۋى مۇمكىن
فوتو:pixabay
2150 جىلعا قاراي ۆەنەتسيا تولىقتاي سۋ استىندا قالۋى مۇمكىن, دەپ حابارلايدى qandastar.kz BAQ.KZ-كە سىلتەمە جاساپ.
مۇنداي تۇجىرىمعا عالىمدار يتاليانىڭ گەوفيزيكا جانە ۆۋلكانولوگيا ۇلتتىق ينستيتۋتى ۇيلەستىرەتىن حالىقارالىق جوبا بارىسىندا كەلدى.
RAI News 24 تاراتقان مالىمەتكە سايكەس, 2050, 2100 جانە 2150 جىلدارعا ۇلگىلەنگەن سۋعا باتۋ ستسەناريى ءححىى عاسىردىڭ ورتاسىنا قاراي قالانىڭ كوپ بولىگى سۋ استىندا قالۋ ىقتيمالدىلىعىن كورسەتتى. مامانداردىڭ باعالاۋىنشا, 139-دان 226 شارشى شاقىرىمعا دەيىنگى اۋماققا قاۋىپ تونەدى.
زەرتتەۋشىلەر سۋ تاسقىنىنىڭ الدىن الۋعا باعىتتالعان «مويسەي» قورعانىستىق كەدەرگىلەر جۇيەسى بۇل جاعدايدا جەتكىلىكسىز بولۋى ىقتيمال دەپ وتىر.
اپاتتىڭ نەگىزگى سەبەبى رەتىندە عالىمدار كليماتتىڭ وزگەرۋىن اتادى. «جوعارى سۋ» دەپ اتالاتىن قۇبىلىس ۆەنەتسيانىڭ بىرتىندەپ سۋعا باتۋىنا الىپ كەلۋدە. قازىرگى ۋاقىتتا ايگىلى قالا جىلىنا 7 مم-گە دەيىن قۇرعاق جەرىنەن ايىرىلۋدا. بۇل اي تسيكلىنە بايلانىستى سۋ اعىسىمەن بايلانىستى جانە جاھاندىق جىلىنۋ اسەرىنەن كۇشەيىپ كەلەدى.
