«ياندەكس.تاكسي» مەن تاكسيشىلەردىڭ ەلدى قالاي الدايتىنى انىقتالدى

جان-جاقتان قىسىم كورگەن تاكسيشىلەر قانداي قۋلىققا باسقانىن اڭگىمەلەپ, الداۋ سحەمالارىنان ساقتاندىردى,-دەپ حابارلايدى Qandastar.kz

ۇلتتىق ستاتيستيكا بيۋروسىنىڭ دەرەگىنشە, قازاقستاندا تاكسي قىزمەتىنىڭ ءتاريفى تاعى قىمباتتادى. 2024 جىلدىڭ مامىر ايىنىڭ قورىتىندىسىندا ونىڭ باعاسى 11,7% ءوستى.

وتكەن ايدا بۇل سەكتورداعى ەڭ سالماقتى قىمباتشىلىق الماتى تۇرعىندارىنا سوققى بولدى: بىردەن 31,3%-عا كوتەرىلدى. اقتوبەدە دە تاكسي باعاسى 22,1% ۇلعايىپ, قولجەتىمسىز بولا ءتۇستى. باتىس قازاقستان وبلىسىندا تاكسيمەن جەتۋ ء«سان-سالتاناتقا» اينالا باستاعانداي: ءتاريفى 21,3% جوعارىلادى.

تاكسي قىزمەتى قاتتى قىمباتتاعان وڭىرلەردىڭ بەستىگىنە سونداي-اق شىمكەنت (16,9%-عا) جانە اقمولا وبلىسى (13,5%-عا) كىردى. وزگە بارلىق وڭىردە باعا وسكەن.

ناتيجەسىندە, Numbeo پورتالىنىڭ دەرەگىنشە, بۇكىل تمد ەلدەرى ىشىندە قازاقستان – تاكسي ءتاريفى ەڭ جوعارى ەلگە اينالدى. سالىستىرساق, ارمەنيادا تاكسيمەن ءجۇرۋ اسا ارزان: 1 شاقىرىم جول ورتا ەسەپپەن 0,28 دوللارعا (نەمەسە 130 تەڭگەگە) تۇسەدى. وزبەكستاندا – 0,29 دوللار, ۋكراينادا – 0,3 دوللار, بەلارۋستە – 0,31 دوللار, رەسەيدە – 0,34 دوللار, ازەربايجاندا – 0,59 دوللار, قازاقستاندا – 0,67 دوللار.

Energyprom مونيتورينگ اگەنتتىگىنىڭ دەرەگىنشە, 2024 جىلعى قاڭتار-ساۋىردە تاكسي ەلىمىزدە 21,2 ميلليون جولاۋشىنى تاسىعان ەكەن. بۇل ءبىر جىل بۇرىنعى كورسەتكىشتەن 8,6% كوپ.

تاكسيمەن جولاۋشى تاسيتىن كومپانيالار بيىلعى ءتورت ايدا 2,8 ميلليارد تەڭگە تابىس تاپقان. سالىستىرساق, بىلتىرعى ۇقساس كەزەڭدەگى تابىسى 1,8 ملرد تەڭگە عانا بولعان. تابىسى كول-كوسىر: 53,8%-عا ءوسىپتى. بۇعان ولار تاريفتەرىن قىمباتتاتۋ ارقىلى قول جەتكىزۋى مۇمكىن.

ايتا كەتەتىن جايت, «ياندەكس.تاكسي», inDriver سياقتى تاكسي اگرەگاتورلارىنىڭ ۇراندارى بىردەي: «جول اقىسىن جولاۋشى بەلگىلەيدى». ءبىر قاراعاندا, ادىلەتتى: قالتاڭىزدا قانشا قارجى بولسا, نەمەسە جولاقىسىن قالاي باعالاساڭىز, سونشا عانا شىعىن شىعاراسىز.

بىراق شىنىندا ولاي ەمەس. مىسالى, باس قالانىڭ كوشەسىندە, جول بويىندا قول بۇلعاپ, جۇرگىزۋشىمەن كەلىسىپ, بەس ءجۇز تەڭگەگە جەتىپ قالۋعا دا بولادى. تاكسي سەرۆيسىندە دە كليەنت 500 تەڭگە باعا بەلگىلەي الادى. الايدا وعان كەلىسەتىن تاكسيشىنى تابۋ مۇڭ. ءبىر ساعات كۇتسەڭىز دە, بىردە ءبىر تاكسيشى ءۇن قاتپاۋى مۇمكىن.

«سول بەس جۇزگە دە تاسىر ەدىك, بىراق ءبىزدىڭ تاپقانىمىزدىڭ ۇلكەن بولىگىن «ياندەكس.تاكسي», يندرايۆەر الىپ قويادى. مەن مىسالى, ەكەۋىندە قىزمەت كورسەتەمىن. جامانى سول, سەرۆيس جەكە كولىگىمەن جولاۋشى تاسىپ, تابىس تاپقىسى كەلەتىن جەكە ادامداردىڭ ءبارىن الدەبىر تاكسوپاركتەرگە تىركەيدى. تالابى سونداي. بىراق مەن ول تاكسوپاركتىڭ قىزمەتكەرى ەمەسپىن, ونىڭ وكىلدەرىمەن ءومىرى كەزدەسكەن ەمەسپىن, سوعان قاراماستان, مەنىڭ كۇنى بويى زىر جۇگىرىپ تاپقان بارلىق تابىسىمنىڭ 4 پايىزىن تاكسوپارك الىپ قويادى. ولاردىڭ ارتىندا مىقتى تىرەگى بارلار, ىقپالدى تۇلعالار تۇر دەيدى, ۇكىمەتتىڭ دە ءتىسى باتپاعان. سودان ول دەلدالدار تاكسيستەرگە ەش كومەك كورسەتپەي, جولاي تەگىنەن تەگىن كوميسسياسىن قىرقىپ الۋدا», – دەپ اشىنادى تاكسيشى ۆاديم باجەنين (تەگى وزگەرتىلدى).

ونىڭ ايتۋىنشا, جان-جاقتان (اگرەگاتوردان, تاكسوپاركتەن جانە جولاۋشىلاردان – ساپار ءۇشىن ناشار باعا قوياتىندار جانە شاعىمداناتىندار كوبەيگەن) قىسىم كورگەن كەيبىر تاكسيشىلەر الاياقتىققا بارا باستاپتى.

مىسالى, «FakeGPS» سياقتى ارنايى باعدارلامالار قويادى: ول ماشينانىڭ كوورديناتتارىن اۋىستىرادى. اگرەگاتور كولىكتىڭ قالتالى ازاماتتار تۇراتىن شاعىناۋداندا ايالداعانىن كورىپ, تاپسىرىستى دا سوعان ۇسىنادى. شىن مانىندە, بۇل كەزدە تاكسيست باسقا كوشەدە كەلە جاتۋى نەمەسە اسحانادا تۇستەنىپ وتىرۋى مۇمكىن.

نەمەسە جۇرگىزۋشى كليەنت شاقىرعان مەكەنجايعا جەتپەسە دە, «كۇتىپ تۇرعانىن» كورسەتەدى. ءسويتىپ, تەگىن كۇتۋ ۋاقىتى قىسقارادى. جولاۋشى تەز جينالىپ, ماشيناعا جەتىپ ۇلگەرمەيدى. ناتيجەسىندە, تاكسيشى اقىلى كۇتۋ ءۇشىن جولاۋشىدان كوبىرەك اقشا الادى.

جولاۋشىلارمەن ىمىرالاسىپ, اگرەگاتوردى الدايتىن تاكسيشىلەر دە تابىلادى ەكەن: كليەنت ءتۇرلى سەبەپپەن تاپسىرىسىنان باس تارتادى, بىراق شىنىندا شاقىرعان تاكسيىمەن كوزدەگەن جەرىنە جەتىپ قالادى جانە جولاقىسىن جۇرگىزۋشىگە قولما-قول تولەيدى.